Shillong, Naitung 29
Ki nongïalam shnong jong ka Bataw ha ka Sngi Ba-ar ki la wan ban pynshai halor ka jingkynnoh na ka liang ka shong Pynurkba, ba ka la don ka jingleh donbor na ki nongïalam shnong ka Bataw, East Jaiñtia Hills District, da kaba rah da ki tiar pynmynsaw haba ïa dei bad ka jingïakajia knieh jaka bad ka la don ruh ka jingïoh pang na uwei u nongshong shnong.
Haba kren sha ki nongthoh khubor ha Shillong Press Club ha ka 29 tarik u Naitung 2025, u Bah Deihok Sumer, Rangbah Shnong ka Bataw u la ong, ba ka jingkynnoh ki nongshong shnong ka Pynurkba ka long ka bym shisha haei-haei ruh.
U la pynrem jur ïa ka jingkynnoh ban pynbudnam namar ka shnong ka don tang kawei ka jingmut bad kata ka long ban pynsangeh ïa ka jingwan tur pud jong ka shnong Pynurkba bad ka jingwan trei sha u pud u sam jong ka shnong.
“Ka shnong Bataw ka kren da ka burom, ka akor ïa kito ki paidbah, ym kumba la kynnoh ba ki wanrah tiar pynmynsaw ban pynsmiej,” la ong u Bah Sumer.
U la ïathuh ruh ba ka shnong ka la long trai ïa katei ka jaka naduh ka 04 tarik u Nohprah (December) 2008 bad ki la longtrai ïa katei ka jaka lyngba ka kot kaba ki la ïoh na ka ophis jong ka JHADC.
Nalor kane, u la ïathuh ba ka don ka jingïalang paidbah ha kaba la ïadonlang u MDC ka thaiñ, Dr. Sanky Sanpru ha kaba ka la don la jingai jingmut na ka liang u MDC ruh ba ïa kane ka jaka dei ban pynbeit noh namar ki ïadei ki paramarjan shnong.
Shuh-shuh, u la pynpaw ba ka shnong ka la buh da ka jingthoh sha u CFO ban pynpaw ïa ka jingpyrshah, hynrei kim shym la sngap bad ka jurip ka la ïaid shakhmat. Wat la ka shnong ka la buh ïa ka shithi pyrshah, hynrei ka ophis u CFO ka la pyllait kot khlem ka jingtip jong ka shnong.
U la ong ruh ba wat la ka shnong Pynurkba ka kyntait ban ïakren bad ka shnong Bataw haba ïa dei bad kane ka jaka ka shnong, ka pyni ba ka kam trai ïa kane ka jaka.
