Shillong, Naitung 29
U Myntri Rangbah ka Jylla, u Conrad K Sangma, ha ka Sngi Ba-ar u la plie paidbah ïa ar tylli ki Outdoor Gym ha Tura, kata ha Goanang bad ha Nehru Park.
Haba plie ïa kine jaka kilan met, u la ong ba ki jingtei kin ai jingmyntoi shibun ïa ki paidbah jong ka sor Tura. U la pyntip ruh ba san tylli ki open gym ki la mih ha sor Tura.
U Myntri Rangbah u la ong ba ïa ki open gym la buh ha kylleng ka jylla, ban ailad ïa ki briew ban im ïa ka rukom im kaba koit bad khiah.
Haba ai jingkren ha katei ka sngi, u la pyntip ruh ba ka Tura Botanical Garden kaba don ha Goanang ka dang ïaid shakhmat, ha kaba ki don ki lynti ïaid kjat na ka bynta ki paidbah, ki canopy walk bad ki jaka bam. La mang pisa haduh T. 3.8 klur na ka bynta kane ka projek.
U la ïathuh ba ïa ka Nehru Park Tura yn nang pynbha shuh-shuh da kaba thaw ïa ki jingtei bad ki jingdonkam bapher-bapher na ka bynta ban lehkai, ban pule bad ban pynïadei bad ki nongwan jngohkai bad ki kam bapher-bapher kiba dei shabar.
Ha kane ka jingleit jngoh jong u kaba shisngi sha Tura, u la buh ruh ïa u maw nongrim na ka bynta ka kamra klas kaba kham heh na ka bynta ka Bidanchi Higher Secondary School. Ïa kane ka jingtei la bei tyngka da ka Chief Minister’s Special Development kaba kot sha ka T. 10 lak tyngka.
U la aiti ruh ïa ki shithi jingmynjur sha ki seng bapher-bapher ha Tura, kaba kot palat T. 80 lak tyngka na ka bynta 12 tylli ki seng pynroi bad ki jaka pule.
Hadien kane, u la jurip ruh ïa ka jingtei jong ka Indoor Stadium kaba dang ïaid shakhmat ha Sunny Hills. U la bthah ïa ka tnad ïalehkai ban pynthikna ban pyndep ïa ka hapoh u bnai Nohprah bad ban pynlong ïa ki jingïalehkai bapher-bapher hapoh ïing kum ka Badminton. Ïa kane ka indoor stadium la khmih lynti ban pynlong ïa ki jingïalehkai na ka bynta ka 39th National Games ha u 2027.
U la pyntip ba ka Tura kan pynlong lang ïa ki jait jingïalehkai bapher-bapher na ka bynta ka National Games bad halor kane, ka Sorkar kan pynshlur bad kyrshan ïa ki Homestay kiba don 10 kamra ha Tura, ban ïa kaba shna ïa ka games village.
U la buh ruh ïa ka nongrim na ka bynta ka jingïalehkai ‘skating’ ha ka Tetengkol kaba ha Tura. Ïa kane ka jaka ïalehkai la pynbha da ka Global Himalayan Expedition.
