Shillong, Naitung 29
Ka Phoebe Dale Nong-rum kaba long ka nongñiah kali bad kaba dei ruh ka Chairperson jong ka Meghalaya Motorsports Society, ka dang bteng ban buh ïa la ka jong ka dak ha ka jingïalehkai kali ha India lyngba ki nam jop ha ka samoi 2024 bad mynta ka dang ïai bteng da kaba ka la kyntiew ïalade ha ka Indian National Rally Championship (INRC) jong ka samoi ïakob jong u snem 2025.
Ha ka por kaba kongsan bha na ka bynta ki kynthei ha ka jingïa-lehkai ñiah kali ha India, ka Phoebe ka la ïohpdiang ïa ka Vice Championship Trophy ha ka INRC Women’s Category 2024.
Da kane ka jingtbit ka la lah ban pynurlong sa ha ka INRC Season 2025, ha kaba ka Phoebe ryngkat bad u paralok ba ïañiah lang u Nash Ross, ki la wan ha ka kyrdan balai ha ka wat ba-ar jong katei ka jingïakob jong ka Blueband Sports Rally ha Coimbatore, kaba la long ha ka 25 tarik haduh 27 tarik mynta u bnai.
Da kaba ïakhun ha ki bun tylli ki wat, ka la ïashim bynta ruh ha ka INRC 3 Category, ha kaba ka la wan ha ka kyrdan khatwei napdeng ki nongñiah jong 27 tylli ki kali bad ïoh ïa ka kyrdan kaba 25 napdeng ki nongñiah jong 57 tylli ki kali. Kane ka jingïalehkai ka dei ban ïoh ïa ka jingïaroh lyngba ka jingtbit ki nongñiah ha ki bynta bapher-bapher.
Kane ka jingïakob ñiah ba la pynlong da ka Coimbatore Auto Sports Club (CASC) ka la tynjuh ïa ki nongñiah kali bad ki kor, hynrei kine ar ngut ki la ïakhun tyngeh ban pynpaw ïa la ka jingtbit.
Kine ki jingai khublei kiba bud ryntih ki pynpaw ïa ka jingkiew jong ka Phoebe ha ka jingïa-lehkai ñiah kali jong ka ri, kaba ai mynsiem ïa ka pateng thymmai jong ki nongñiah kali na ka Jylla bad ka thaiñ shatei lammihngi. Ka jingleit jong ka, ka ïeng kum ka jingpynshisha ïa ka jingaiti, ka jinglah ban shah, bad ka bor jong ka jingmihkhmat ha ka jing-ïalehkai ñiah kali hapoh ka ri.
