Shillong, Naitung 29
U President ka Khasi Student’s Union (KSU) Sengkmie, Bah Lambokstar-well Marngar u la ong ba ka Sorkar ka dei ban sngewlehraiñ ban shah pynkynmaw manla ka por halor ka jingdawa ban pyntreikam noh ïa ka Inner Line Permit (ILP) hapoh ka Jylla namar ka Sorkar India haduh mynta kam pat ai ILP ïa ka Jylla katba ka Jylla Manipur pat ka la dep ban ïoh.
Haba kren sha katto-katne ki lad pathai khubor, u Bah Marngar u la ong ba baroh 60 ngut ki Nongthaw Aiñ ki dei ban shim jingkitkhlieh halor kane la ki dei kiba don ha ka liang synshar ne kiba don ha ka liang pyrshah ruh.
Ha kaba ïadei bad ka jingbeh ka Sorkar Assam ïa ki briew kiba sah beaiñ ha katei ka Jylla, u Bah Marngar u la ong ba ka Seng ka la peitngor bha ïa kine ki briew kiba shah kyndang ha ka Sorkar Assam bad ki don shibun ngut ki briew kiba ka Seng ka la ïoh ban bat bad phah leit phai noh ïa ki na ki jaka ba ki wan.
“Ngi la peit pyrman naduh mynsngi mynshai haduh mynmiet ruh bad ki la don shibun ngut kiba ngi la ïoh ban bat bad pynphai sha ka Jylla Assam kaba ki wan namar ngi la sngewthuh ba ka Jylla kaba suk tam ban wan ka dei ka Jylla jong ngi,” ong u Bah Marngar.
U Bah Marngar u la ong ruh ba kaba sngewsih ka long ba kiba ïoh ban bat ïa kine ki briew ki dei ki Sengbhalang ym kita kiba ka Sorkar ka la bthah ïa ki ban long kiba peitngor.
“Hynrei kaba sngewsih ban ong ka long ba la ïoh ban bat ïa ki briew nabar da ki kynhun sengbhalang ym da kita ki bor jong ka Aiñ. Kata ka jingbthah jong ka Sorkar la ka dei ka jingbthah naduh mynsiem ne ka dei ka jingbthah tang ban shu pyndep rukom ruh, kata ngim tip bad tang ka Sorkar kaba lah ban jubab ïa kata. Kumba ïohi ma ngi, ka long kaba synjor bad kaba laitlan haduh katta-katta,” ong u Bah Marngar.
Da kaba pynpaw ruh ba lada ka Sorkar kam don ïa ka jingkitkhia ha kum kane ka por, ka jingma kan wan lynshop ïa ka Jylla bad ka Jaitbynriew bad ha kata ka por, kan dei ka Sorkar kaba hap ban shim ïa ka jingkitkhlieh.
U la ong ruh ba ka Seng kan ym shongthait ban khynra na ka por sha ka por bad ba ki nongsah beaiñ kin ym ïoh shongsuk ne shongshngaiñ hapoh ka Jylla.
Ha kaba ïadei bad ka jingkren u Myntri ka Tnat Excise ka Sorkar Jylla, Bah Kyrmen Shylla ba kiba nabar kin ym ïoh rung da kaba suk shapoh ka Jylla namar ba ka la don ïa ka Land Transfer Act, u Bah Marngar u la ong ba ki bar jylla ki ïoh rung ha ka Jylla lyngba ka shongkha-shongman, ka khaïi-pateng, kumta u la ong ba hangno ka don kata ka sakhi ba kine ki aiñ ki ïada ïa ka Jaitbynriew jong ngi.
Kumta, u la pynphai nia ïa u Myntri ban pynleit jingmut bad pynthikna ba ka ILP kan treikam bad ba ki matti jong ki kum ki Nongthaw Aiñ kin sah khnang ba ka pateng kan ai jingïaroh ïa ki.
“Nga shu kwah ban ong ïa une u Myntri ba un pynleit jingmut ban thaw ïa ki Aiñ bathymmai, ban pynthikna ba ka ILP kan treikam bad ba ki matti jong phi kum ki nongthaw Aiñ kin sah khnang ba ka pateng kan ïoh jingïarap hynrei lada kata ka jinglong Nongthaw Aiñ ka shu kut tang ha ka jingsam skhim, ban leit plie ïingdorbar bad kumta ter-ter, nga sngew ba kane ka long lehnohei noh,” bynrap u Bah Marngar.
