
Shillong, Naitung 29
U kapten barim ka Italy u Andrea Pirlo u la shah thung kum u coach ka United FC kaba na Dubai.
Kane ka long ka klob kaba saw na ka bynta utei u khlur ïalehkai barim uba la don ha ka rta 46 snem, ha ki saw san snem naduh ba u la shimti ïa ka Juventus ha u 2020.
U Pirlo u la lah ban pynjop ïa ka Coppa Italia bad ka Italian Super Cup hadien ba u la mih bujli ha ka jaka jong u Maurizio Sarri ha Turin, hynrei u la shah weng noh ha ka Juve ha kaba kut jong ka samoi hadien ba ka kynhun jong u ka la wan ha ka kyrdan kaba saw ha ka Serie A.
U la neh ruh tang shisnem duna ha ka kynhun ïalehkai jong ka Turkey, ka Fatih Karagumruk bad u la don 14 bnai bad ka Sampdoria shwa ban mih noh ha u Nailar 2024.
Ka United FC, kaba ju tip ruh kum ka Dubai United, ka ïakhun ha ka kyrdan ba ar jong ka jingïalehkai phutbol ha United Arab Emirates, kaba don hapoh jong ka Pro-League. La ïathuh ba u Pirlo u la soi ïa ka kontrak ar snem bad katei ka klob.