Babu Kular Khongjirem
U Myntri ka Sorkar Meghalaya bad uba dei ruh na ka UDP kaba dei ka paralok ba la pynïaid lang ïa ka Sorkar Synrop (coalition partners) MDA-II ba la ïalam da ka NPP, u la antad ba ka jingjah ki thup dewïong haduh kumba 4000 metric ton ka lah ban dei ba shah rong noh ha u slap bah uba jur jong ka Meghalaya. Kat na ka shyntur u Myntri Sorkar kan mih kane ka kyntien ka la pynkyndit bad pynlyngngoh lut ïa ki paidbah bad bun kiba shu ïa ang lyngngoh noh tyngheng kumno ka umslap ka lah ban rong lut kat ïa ki thup dewïong ba 4000 metric ton. Don ki paidbah kiba kwah ban ïa leit peitkai bad leit shon dur ruh shaduh shaei kine ki thup dewïong ki poi.
Lada don kiba khaïi beaiñ ruh, ka Sorkar ka dei ban wad haduh ban da shem ne lap. Lada dei ba tuh ki rit ki ria tang shi byrni u dewïong ruh, la khih ka shnong ka thaw baroh kawei bad ym don jingmap shuh ïa ki bapli, bad kin poi beit khlem artatien ha ruh nar (along). Lada dei ki High Level pat, da ki hajar trok (trucks) ruh ka biang beit. Katba nang slem, katta nang biang ïa ki namar ka ktien ki riewstad ka ong, “Katba nang slem ka jingbishar, katta ka nangjah nangjah ka hok (justice delayed, justice denied).
Kaba donkam eh mynta ka long ba ki liang pyrshah kim dei satia ban shu aili ïa kum kine ki raibi ba sniew (bad precedence) ha ka ri jong ngi. Dei ruh ban dawa da ka jingwad bniah (enquiry) da ka CBI ne da ki ED jong ka Sorkar India ban lap ïa ka jingshisha baroh. Lada dei ba rong lut ka um slap ba jur ruh, dei ban da pyni bad ring dur (video) shaduh ka wah ne wat shaduh Assam ne Bangladesh ba twa une u lum thup dewïong uba heh khnang ban sakhi shisha ba ka dei. Lada don ba leh thok lei lei, ka Hok kan sa paw hi ha kaba khatduh. Ki pyrkhat ïa ka jingphohsniew ban jop ïa kata ka thong (target) ïa kata ka 10 billion ha ka state Meghalaya da kaba shim ram (loans) da ki phew hajar klur na ka ADB bad ka umslap rngai (ghost rainfall) ba kit ei ïa ki thup dewïong ba heh, tip shaei keiñ kan poi ka jylla jong ngi hadien-habud.
Ki pulit ki ïoh jingïaroh ïa ka jingtbit jong ki ïa ki kam sniew jong ka Sonam ba ka la shet kylla ban pynïap ïa la u jong u lok, u Raja Raghuvanshi, ki la dei ban trei shitom sa ïa kane ka jingjah kyndit-kyndit ki thup dewïong. Jin lada ki pulit ki jop shisha ban lap ïa ka jingshisha sa ïa kane ka jingjah noh kine ki thup dewïong heh, lehse, ki lah ban ïoh jingïaroh bad ïoh ‘award’ syndon ym tang ha Meghalaya hynrei wat ha ri India bad ha ka pyrthei hi baroh kawei.
