Kohima, Naitung:
Kumba la thmu, la ong ba ka Nagaland kan tei 23 tylli ki hostel bathymmai na ka bynta ki samla pule ki riewlum hapoh ka DAJGUAshiphew tylli ki skul ha Nagaland yn pynroi kum ki PM SHRI Model Institutions. Kine ki don jingthmu ban pynbha ïa ki jingtei bad ka jingpule digital ha ki skul
Kane ka jylla ka thmu ban ïoh 23 tylli ki hostel bathymmai na ka bynta ki samla pule riewlum, bad shiphew tylli ki skul ha ka jylla yn pynroi hapoh ka skhim PM SHRI.
Ïa kane ka jingpynbna la pynbna da u Myntri ka tnad pule puthi jong ka sorkar pdeng u Dharmendra Pradhan ha nongbah New Delhi ha ka por ba la rakhe ïa ka jingdap san snem jong ka National Education Policy (NEP) 2020 ha ka sngi Ba-ar.
Kane ka jingthmu ka long ban pynkylla ïa ki skul sorkar sha ki jaka pule ba tbit bad ban pynthikna ïa ka jingnang jingstad kaba kham bha na ka bynta ki khynnah skul riewlum.
Kum shi bynta jong ka skhim PM SHRI (Schools for Rising India), la jied kawei ka skul ha man ki 10 tylli ki distrik jong ka Nagaland na ka bynta ban pyntreikam hok ïa ka NEP 2020, ong ka jingthoh ba la phah.
Ïa kane ka prokram, kaba la pynlong ha Bharat Mandapam ha Delhi, la pyni Live ha kylleng ka ri bad la sakhi ruh ïa ka jingïashim bynta kaba tyngeh na ki khynnah skul, ki nonghikai, ki kmie ki kpa, bad ki nongïalam shnong ha Nagaland.
Kine ki skul kin long kum ki jaka pule ba long ka nuksa hapoh ka Network jong ka ri baroh kawei jong ki 14,500 tylli ki skul PM SHRI, ba la thmu ban kyntiew ïa ka jingpule kaba bha lyngba ki jingpynbha ïa ki jingtei, ka jinghikai digital, ka jinghikai ïa ki nonghikai, bad ki jinghikai kiba pynshong nongrim ha ki khynnah skul, la ong ka khubor.
Ha Kohima, ïa kane ka jingïalang la pynlong ha TM Government Higher Secondary School bad la wan ïashim bynta da u Advisor for School Education u Kekhrielhoulie Yhome, u Commissioner bad Secretary for School Education u Kevileno Angami, bad ki nongmihkhmat jong ka tnad pule skul, ka Samagra Shiksha, ka SCERT, bad ka NBSE.
La buh ruh ïa ki mawnongrim na ka bynta ki 23 tylli ki hostel ha ka jylla, ban pynroi hapoh ka Dharti Aaba Janjatiya Gram Utkarsh Abhiyan (DAJGUA) .Ïa ka DAJGUA, kaba la sdang ha baroh kawei ka ri ha ka 2 tarik u Risaw, 2024, ka thmu ban kyntiew ïa ki jaitbynriew riewlum lyngba ka jingpynroi ba ïatylli ha ka pule puthi, ka koit ka khiah, ka kamai kajih, bad ki jingtei.
Hapoh ka bynta jong ka pule puthi jong kane ka jingthmu, ka tnad pule puthi, lyngba ka Samagra Shiksha, ka dang shna 1,000 tylli ki hostel bathymmai ha baroh kawei ka ri ban ai jingmyntoi ïa ki samla pule riewlum, ong ka jingthoh ba la pynbna.
