Shillong, Naitung 29
U Superintendent of Police (SP) jong ka tnat Anti Narcotic Task Force (ANTF) u Giri Prasad, IPS ha ka 29 tarik mynta u bnai u la pynmih ka jingmaham pyrshah ïa ki trai ïing bad ki trai kali kiba ai wai ïing ne ai wai ïa la ki kali ba kim dei ban ailad ïa ki nongkynti jong ki ban pyndonkam na ka bynta ban khaïi drok ne ki kam ba ïadei bad u drok.
U la ong ba katkum ka kyndon 25 jong ka NDPS Act, ka jingailad ïa ki jaka ne ki kali ban khaïi drok ka dei ka kam runar kaba lah ban shah pynshitom, kaba la shah kheiñ beaiñ bad ka kit ïa kajuh ka jingpynsaja kum ka kam khaïi drok.
U SP u la kyntu ïa ki trai jaka bad ki trai kali ba ki dei ban pyntip mardor sha ki pulit ne sha ka ANTF lada don ka jingsuba don kino-kino ba ki ishankhmat.
“Kumta, baroh ki trai ïing bad ki trai kali kiba ai wai ïa ka ïing ne ka kali, sngewbha ban pyntip sha ka tnat pulit lane sha ka ANTF lada don ka jingsuba ba ïa ka ïing/kali jong phi la pyndonkam na ka bynta ka jingthmu ban khaïi drok ne kino-kino ki kam kiba ïadei bad u drok kiba lah ban shah pynshitom katkum ka aiñ NDPS Act, 1985,” la ong u SP.
Kumjuh, kiba kwah ban ai jingtip halor kane ka phang ki lah ban phone ne pyntip sha ka tnat ANTF ka jylla kata ha u number 8787808749.
