Nongpoh, Naitung 30
Ki nongïalam jong ka Khasi Students’ Union (KSU) North Khasi Hills District ba la lamkhmat da u samla Ferdynald Kharkamni ha ka Sngi Balang ki la leit ban kynduh ïa u Chancellor jong ka University of Science & Technology Meghalaya (USTM), u Mahbubul Hoque ban ïakren halor ki mat kiba ïadei bad ka bha ka miat ki samla pule, khamtam na ka bynta kito kiba wan na ki longïing kiba duna ha ka ïoh ka kot.
Haba kren sha ki lad pathai khubor hadien katei ka jingkynduh ïa u Chancellor ka USTM, u samla Ferdynald Kharkamni u la ïathuh ba na ka liang ka seng ka la ïoh ïa shibun ki mat ban ïakren bad ïathir ha kane ka sngi bad ki dang don ruh ki bym pat lah ban poi sha ka jingkut, hynrei kiba kum ka seng kan dang ïai buddien ha ki sngi bad ki por kiba dang wan.
U la ïathuh ba lyngba ka jingshimkhia jong ka seng, ki don haduh 12 ngut ki samla pule Khasi kiba wan na ki longïing kiba duna ha ka ïoh ka kot kiba la ïoh ïa ka jingpule ei ha katei ka skulbah USTM ha ka kyrdan Under Graduate khlem da donkam ban siew pisa eiei.
U samla Ferdynald Kharkamni u la ïathuh ba ka seng ka la ïoh ruh ban ïakren halor ka bynta ba katei ka skulbah ka dei ruh ban bteng ïa kane ka jingai jinghikai ei ïa ki samla kiba duna ha ka ïoh ka kot wat ha ka kyrdan Post Graduate bad ruh na ka bynta kito kiba pule doktor lane MBBS naduh mynta u snem.
