Shillong, Naitung 30
Ka Manipur ka la ïoh ban rah biang ïa ka nam lahduh ha ka sien balai jong ka Junior Boys’ National Football Championship na ka bynta ka Dr. B.C. Roy Trophy (Tier 1) hadien ka jingïai ap kaba 25 snem. Kane ka la wan urlong hadien ba la pynliem ïa ka West Bengal da 3-0 kol ha ka jingïakhun phainal kaba la long ha ka Sngi Balang ha Guru Nanak Dev University Sports Complex.
Kane ka nam jop ka la wan urlong ruh lyngba ki kol ba la thep da u Lou-rembam Naocha Singh, Ngayungmi Kashung bad u Amom Krish Singh.
Ha kane ka jingïakhun ka Manipur ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Lourembam ha ka minit kaba 17. Hadien shiteng kynta kane ka kynhun ka la pynbud biang ïa ka kol ba ar lyngba u Ngayungmi (37).
Wat lada ki khynnah ïalehkai ka West Bengal ki la pyrshang kat lah kat ïai ban pynphai, hynrei kim shym la lah ban pynurlong. Ha shwa ban wai ka Manipur ka la thep biang sa shi kol lyngba u Amom Krish ha ka minit kaba 90+2 na ka bynta ban long shisyndon ka nongjop.
