Shillong, Naitung 30
Ar ngut shipara kiba la shah kem ha ki pulit bad shah set along ruh hadien ka jingshah pharep ba ki dei ki nongkhaïi drok, ki la ïohpdiang noh ïa ka rai na ka ïingbishar ba la pyllait noh ïa ki na ka mukotduma Narcotic Drugs & Psychotropic Substances (NDPS) ba la pynngat pyrshah ïa ki.
Kine ar ngut shipara ki kynthup ïa u Fedrick Kharkrang kum hynmen bad u Pascal Kharkrang kum para. Kine ki dei kiba la shah kem ha ka 2 tarik u Jymmang, 2025, na Umsning ha ka por kumba 9:45 baje eiei mynmiet hadien ba ki pulit ki la pynap shrip na ka khubor kaba ki ïohpdiang ïa ka jingtip halor ka jingdon jong uwei u nongkhaïi drok ba la tip kyrteng kum u Wellborn Khongjoh, kaba ka mukotduma pyrshah ïa u kan dang bteng.
Kum ban shu pynkynmaw, ha ka jingpynap shrip ban ïoh kem ïa u Wellborn, ki pulit ki la kem lang ïa kitei ar ngut shipara kiba dei ruh ki trai jong ka kali kaba la shah kurup noh ha ki pulit ha ka por ba ki dang kiew na Nongpoh sha nongbah Shillong.
Na ka jingkem ïa kine lai ngut na Nongthymmai Umsning, ki pulit ha ka jingtalasi ki la ïoh kurup ïa u drok ba la suba u Heroine kumba 10.9 gram.
Haba kem ïa kine lai ngut, ki pulit ki la phah ruh ka kyrwoh ha ryngkat ka kyrteng jong kine lai ngut kiba kynthup ïa u Wellborn Khongjoh na Kynjoiñ Umran, u Fedrick Kharkrang bad u Pascal Kharkrang na Shangbangla Ri-Bhoi District bad ruh ban thoh ba ki dei ki nongkhaïi drok kaba ki la phah ha ryngkat ki dur kaba na ka liang ki lad pathai ki la kah noh pat ïa ka durkhmat.
Hadien ba la kem, kumba ka dei ka rukom jong ka aiñ, ki dei ban shah rah tiañ bishar na ka bynta ban pynshisha la kine ki donkti ne em bad kane ka kam khaïi drok, kaba ha ka jingïaid ka jingbishar, u IO jong ka case u la pyntip ha ka ïingbishar ba ki pulit kim don sabut pyrshah ïa u Fedrick bad Pascal, kumta ka ïingbishar jong ka Special Judge, NDPS Ri Bhoi District ha ka 11 tarik u Naitung, 2025, ka la pynsngew ïa ka rai.
Ha ka rai ba la pynsngew, ka ïingbishar jong ka Kong B Mawrie, Special Judge NDPS, ka Case No.6 jong u 2025, ka la pyntip ba ïa ki ar ngut shipara la rai ban pyllait noh bad ban pynneh shuwa tang ha kaba ïadei bad u Wellborn Khongjoh.
