Mawkyrwat, Naitung 30
Namar ka jingsuki bad jingsahteng ban pyntrei ïa ki jaka sah (staff quarters) ki nongtrei ka tnat ka koit ka khiah jong ka Civil Hospital Mawkyrwat, ka HYC South West Khasi Hills lyngba u President samla Pynskhem Kharjahrin uba dei ruh u nongïasaid aiñ, ha ka 29 u Naitung 2025 u la leit buh da ka RTI hakhmat u Public Information Officer ba dei peit ïa kane ka bynta ban pan jingpynshai halor kiei ki daw kaba pynlong ïa ka jingsuki bad jingsahteng ha kaba ïadei bad ka jingpyntrei ïa ki quarter hapoh Mawkyrwat.
U samla Pynskhem u la ïathuh ba katkum ka jingïoh jingtip, ka seng ka la lap ba ka jingpyntrei ïa kine ki jaka sah ki nongtrei (Staff Quarters) jong ka Civil Hospital hapoh Mawkyrwat ka la kynjoh mynta la palat 13 snem hynrei kaba sngewsih ka long ba haduh mynta ym shym la lah ban pyndep.
U la ong ruh ba ka jingsangeh noh jong ki kontraktor ban trei pyndep ka dei ruh kawei na ki daw ba pynlong ban sahteng bad suki hynrei ym shym la tip pat balei ba ki hap ban sangeh noh shiteng por.
Haba kren sha ki lad pathai khubor hadien ba la dep ban buh ïa ka RTI, u samla Pynskhem u la ong ba ka seng kan sa buddien ha kaba ïadei bad kane ka kam hadien ynda la dep ïoh ïa ka jubab na u PIO ba dei peit ïa kane ka bynta.
