New York, Naitung:
Katkum ki khubor, la ong uwei runar uba dei u nongsiat ha ka jingjia synreit kuli ha New York, u la siat-iap ia uwei u heh pulit jong ka nongbah New York, uba dang don hapoh ka kam bad ruh ia 3 ngut kiwei de ki briew ha shwa ba un shim noh syndon pat ia la ka jingim, ha kawei ka ophis hapoh Manhattan, ha ka Sngi Nyngkong.
Ki bor ka aiñ ki dang ialeh ban wad bniah ïa kaei kaba la jia baroh bad kumno ka leit jia ruh ha katei ka nongbah kaba ki bor pyniaid ki ju tip ba ka long ka jaka kaba shngaiñ bad ka bym ju kham don ki jingjia ne ki kam sniew kumba la sakhi ha kane ka sien.
Katkum ka durkhih ba la ioh peit bniah da ki pulit na ki CCTV kiba don ha katei ka jaka, la ong ba utei u briew u la mih na kawei ka kali BMW kaba la pynieng arsien bad u don ia ka suloi M4 bad nangta u la iaid sha katei ka iing heh kaba don ka jaka treikam jong baroh ar tylli ki NFL bad ka Blackstone, kawei na ki kompeni bei tyngka ba heh tam ha ka pyrthei, bad kumjuh kiwei de ki nongshong wai ha ka janmiet jong ka Sngi Nyngkong.
Mar ia poi ha katei ka jaka, la ong ba utei u runar u la siat beit-beit ia u heh pulit ka NYPD katba u dang rung shapoh katei ka iing shwa ban siat ia kawei ka kynthei kaba la pyrshang ban rieh, la ong ka Commissioner pulit ka Jessica Tisch ha ka jingialang bad ki nongthoh khubor.
Nangta pat, utei u ‘riew kieng-atiar u la leit sha ka ‘lift’ jong katei ka Bank bad u la siat sa ia uwei u nongap pahara uba dang rieh ialade hadien jong ka miej ïada kaba u shong bad utei u runar u la siat ruh ia uwei pat u briew uba don ha katei ka jaka.
Hadien ba utei u runar u la leit poi da ka ‘lift’ sha ka mala 33 jong kawei ka kompeni, u la siat-iap sa ia uwei pat u briew bad nangta u la iaid lyngba kawei ka lynti iaid bad siat noh shisyndon ialade.
Ki pulit ki la pynithuh ia utei u ‘riew kieng-atiar kum u Shane Tamura uba dei na ka nongbah Las Vegas bad uba don jingthut ha ka bor pyrkhat bad lehse kane ka long ka daw jong katei ka jingjia baroh ha katei ka sngi.
U Mayor jong ka nongbah New York, u Eric Adams, u la ong ha ka Sngi Thohdieng ba u Tamura u la pyrshang ban thom ia ka jaka treikam jong ka National Football League hynrei u la shim ia ka ‘lift’ kaba bakla. Ki nongtohkit ki ngeit ba u la pyrshang ban leit sha ki ophis jong ka NFL hynrei da kaba bakla u la rung ha ka set kaba bakla jong ki bank lift, la ong u Adams.
Wat la katta, ym pat lah ban tip shai ia ka jingthmu ne ka daw jong katei ka jingjia, hynrei katkum ka jingthoh, ki nongtohkit ki dang wad bniah ioh lehse utei u briew u thmu leit thombor ia katei ka iing namar ba ka dei ka jaka treikam jong ka NFL.
