Shillong, Naitung 30
Ka jingbym thikna sdang ne ka wat ïa ka lawei jong ka Indian Super League (ISL) ka la pynlong ïa ki phra tylli ki klob ban ïatylli lang na ka bynta ban phah da ka jingthoh sha ka All India Football Federation (AIFF) “da ka jingsngewkhia bad jingkitkhlieh lang ïa ka jinglong bad lynti jong ka phutbol mynta hapoh ri India.”
Ka jingïalehkai ISL jong kane ka samoi la buh ban sdang naduh ka 14 tarik u Nailur. Hynrei ka FSDL, kaba ïateh lok bad ka synjuk lem bad ki trai jong ka league, ki la pynsangeh noh ïa kane ka lympung ïalehkai phutbol kaba khlieh duh jong ka ri namar ka jingbym shai bha halor ka soskular kaba 15 snem ne ka Master Rights Agreement (MRA) ka ban kut ha ka 8 tarik u Nohprah mynta u snem.
“Ha ka jingbym don ka jingïadei kaba biang bad ka jingbym shim khia na ka bynta ki klob, la ka long na ka AIFF ne na u nongbat ïa ka hok ban pynïaid ïew (commercial rights), ki klob mynta ki shem ba kim lah ban thmu ryngkat bad ka kyrdan jong ka jingïohi bad jingthikna kaba ki kam ïalehkai phutbol ki donkam,” la thoh kine phra tylli ki klob ha ka shithi sha u President jong ka AIFF u Kalyan Chaubey ha ka Sngi Ba-ar.
“Kane ka la ktah ym tang ïa ki rai kiba lyngkot hynrei mynta ka la sdang ban ktah ïa ka rukom pynïaid ki jaka pule jong ngi,” ki la bynrap.
Ki klob kiba la khot ïa ka “jingïakren kaba tei” bad u president ka AIFF bad ka jingïakynduh kham kloi ki kynthup ïa ka Bengaluru FC, Jamshedpur FC, FC Goa, Hyderabad FC, Kerala Blasters FC, NorthEast United FC, Odisha FC bad Punjab FC. Katba lai tylli ki klob na Kolkata – ka Mohun Bagan Super Giant, East Bengal, Mohammedan Sporting kim shym la soi satia ïa kane ka shithi, katba ka Mumbai City FC bad Chennaiyin FC ruh ki la pynjngai ïalade.
Ki phra tylli ki klob ki la ong ba ki kam kum ka jingkyntiew ïa ki samla (youth development), ka jingpynrung nongïalehkai, ka jingpynrung kam, ka jingmang pisa, bad ki prokram kiba naduh tynrai, baroh kine ki donkam da ki bnai ban pynurlong, hynrei da kane ka jingbym thikna ka la wanrah ka jingeh kaba khraw na ka bynta jong ki.
“Katba kane ka jingbym thikna ka nang bteng, katta ka nang buh ha ka jingma ba ki snem jong ka jingkiew kin kynjoh sha ka thong.
“Kaba sngewkhia ka long ba kiba bun ki klob ki la shah pynbor ruh ban pynsangeh noh ïa ki jingtreikam ha ka ban kyntiew ïa ki samla namar ka jinglong jingman mynta; ban pynsangeh noh ïa ki jinghikai, bad ki kam kiba ïadei bad ki shlem hikai. Kane ka buh ha ka jingma ïa ki jingtei kiba dang pynroi kiba la shim por da ki snem ban tei bad kiba la thmu ban shakri kum ka lad ban kyntiew ïa ki sap ïalehkai ha ka jingïalehkai phutbol.”
Ki klob ki la ong ba ka jingïakren kaba tei hapdeng ka AIFF bad ki klob kiba ïashim bynta ka long kaba kongsan bha.
“Ka jingthmu jong ngi ka long ban sngewthuh-bad ban noh synñiang katba lah ha ka rukom pynbeit. Kum ki klob, ngi dang ïai don ka jingkitkhlieh kaba jylliew ha ka jingroi jong ka jingïalehkai ha India bad ngi pynkhreh ban ïatreilang bad ka bor pynïaid ban jop ïa ki jingeh kiba mynta,” la bynrap ki klob.
Lah ban kdew ba ha ka taïew ba la dep, u Chaubey u la pynthikna ïa ki klob, ki nongïalehkai, ki coach bad kiwei-kiwei ki nongïashim bynta, ba ka ISL kan long mynta ka samoi, kaba lah ban long da kaba pynslem khyndiat namar ka mudui kaba dang ïaid shakhmat ha ka ïingbishar khlieh duh jong ka Supreme Court. Ha u Ïaïong mynta u snem, ka ïingbishar ba hakhlieh duh ka la kyrpad da ka ktien ïa ka AIFF ba kan nym shim kano kano ka rai halor ka jingpynthymmai ïa ka MRA tad haduh ban da mih ka hukum kaba khatduh.
