Ka ai jait kpa ka donkam katkum ka jingkylla jong ka por. Don bun ki daw ban sakhi ba ka ai jait kpa ka kham bha ban ïa kiba ai jait kmie. Kane ym dei ba nga pyrshah ïa ka jingai jait kmie.
Nga ruh nga ai jait kmie. Hynrei naba nga peit ïa kane ka rukom ai jait kmie nga ïohi ba ka nang pyntroiñ ïa ka ri bad ka jaitbynriew. Ban lait na ka duk ka kyrduh ka sang ka ma bad ka kit khunrei ha ki kynthei ba tlot bor ka la dei ka por ban kylla ïa kane ka rukom ai jait ïa kynja sha ka liang u kpa.
Dei ban ai jait kpa ban neh ban sah ka nongkynti, ka spah ka phew ba la buh ki kmie ki kpa. Ka synshar ka khadar ka hiar pateng jong ngi ki Khasi ka la synjor palat namar ki khun shynrang kim ïoh lad ban bteng ïa kaei ba la buh ka kmie bad u kpa. La ïap tram lut ki Bri ki bsah ba la buh ka kmie bad u kpa. Namar ki khun kynthei bad u shongkha kim lah ban bud bad bteng ïa ki diengjat ba la ïalam ka kmie bad u kpa kumba ka paw ha ka jaitbynriew jong ngi. Kane ka long ka jingiohi jongnga katba nangïaid ki sngi ki ïa, ka jingkylla ka la wan beh kum ka eriong kaba rat naphang ïa ka jaitbynriew.
Kumta ngi dei ban ïaid katkum ka por ym ba ngin shu bat sah ïa ka dustur ka riti synjor. Ka ai jait kmie ka la biah phongrai bad pynsniew dur ïa ka jaitbynriew. Kumta ka la dei ka por ban pynkylla dur ïa ka jaitbynriew. Kumta ka la dei ka por ban pynkylla noh da kano kano ka rukom kaba ïahap bad ka por. Ka shongkha shongman ha ngi ki Khasi ka la synjor palat ban ïa nujor bad kiwei ki jaitbynriew.
Kumta ka la dei ban pynkylla noh ïa kane ka ai jait kmie sha ka ai jait kpa ban roi ban par ban im ka ri bad ka jaitbynriew. Haba phai ha ka jingngeit ka pynpaw ba ngi la kylla lypa namar bun kiba ïa kylla sha ka niam khristan.
Te balei ym lah ban kylla ïa ka rukom ai jait jong ka kmie sha ka jait jong u kpa. Haba ïa ka niam ngi la kylla bad ïa bud ruma ïa ka niam bad jinghikai u nongwei nongar. Namar ka ai jait kheiñ jait ka dei tang ka dustur briew ngi lah ban kylla na ka bynta ka jingbha ha ka imlang ka sahlang salonsar ha ka jaitbynriew.
C. B. Iawphniaw
