Shillong, Naitung 30
U Joint Secretary ka All India Congress Committee (AICC) In-charge ka Meghalaya, u Mathew Antony, u la ong ba ka jingmih noh jong u Bah Ronnie V Lyngdoh kam shym la wan kum ka jingkyndit ïa ka seng namar kane ka dei ka jingshah thied ha ka NPP kaba synshar da ka pisa ba la ïoh lyngba ki kam bamsap bad ki kam lute ïa ki paidbah ka jylla Meghalaya kaba dang ïai bteng.
“Baroh ngi tip ïa ka jinglong jong u Judas uba la kylla long u synran ba la shah jied napdeng ki 12 ngut, tang ban shet kylla ïa uta uba la pynsan ïa ki. Kumjuh ruh bad ki 3 +1 MLA jong ngi kiba la pyndep ïa ka jinglong ba ïaineh jong ki ban jop kum ki MLA da ka dak kti jong ka Congress bad nangta ban shet kylla ïa ngi na ka bynta ki pisa rupa ba la tyrwa ha ki,” ong u Joint Secretary ka AICC.
Katkum u Joint Secretary, ka Congress ka la don shwa jong kine ki MLA bad ong ba ka Seng kan sa dang kham khlaiñ shuh-shuh da ka jingdon ïa ki nongïalam bathymmai kiba la pynrung ha ka seng ha ki sngi ban wan.
“Ka jingkular jong ngi ka long ban lait na kane ka Sorkar bamsap bad ban pyllait im ïa ki paidbah ka jylla Meghalaya na kum kane ka jinglute kaba pynlong ïa ki ban duk bad nang duk manla ka sngi”, ula ong.
“Haba ki Myntri bad ki MLA jong phi ki thied kali thymmai, ki ïing bad ki jingleit jingwan kiba remdor, ngi kyrpad ïa ki paidbah ka Meghalaya ban kylli ïa ki, kaei ka tynrai jong ka jingmih kynsan jong ki. Lada kim jubab ne pyni ïa ka jingkiew kynsan jong ka kam jong ki na ka Sorkar, sngewthuh ba ka dei ka pisa jong ki paidbah ka Meghalaya kaba shah lute na ka bynta ban thied MLA, thied ïing thymmai, shna ïing thymmai, phah pule shabar ka ri kaba rem dor ïa ki khun jong ki”, u la ong.
U la ong ba ka Congress ka kular ban bteng ïa ka jingïakhun jong ki na ka bynta ki paidbah ka jylla Meghalaya.
“Ka dei ruh ka jingshisha ba ka jingbym lah treikam jong une u MLA shimet ka la pynlong ïa u ban sngewthuh ïa ka jingshisha ba un ym jop ha ka ilekshon ban wan, kumjuh ruh u lah ban shah kyntait tiket ha ka seng ha ka ilekshon ban wan kaba dei ruh ka daw jong kane ka jingshet kylla ïa ka pisa rupa”, u la ong.
