Shillong, Naitung 30
Hadien ba u Myntri ka Sorkar Jylla, Bah A.L. Hek u la ong ba ka MRSSA-2016 ka dei kaba lah ban tehlakam ïa ka jingwan rung kyrthep ki briew nabar shapoh ka jylla, ka la pynlong ïa u President ka Hynñiew-trep Youths’ Council (HYC) Bah Roykupar Synrem ban mih sha-khmat ban kynthoh bad buh jingkylli ruh ïa u Bah Hek, haei kata ka jingthoh kaba ong ba kata ka MRSSA-2016 ka tehlakam ïa ka jingrung ki briew ba nabar?
Haba ïakren bad ki lad pathai khubor ha ka Sngi Balang ka 30 tarik u Naitung 2025, u Bah Roykupar Synrem u la ther tyngeh ïa u Bah Hek ba ha kano ka dur ba u ong, ba ka MRSSA-2016 kan tehlakam ïa ka jingrung jingmih ki briew nabar.
U Bah Roykupar u la ong, “Ha ka MRSSA kam don ka jingthoh kaba kdew ba ka lah ban tehlakam ïa ka jingwan rung kyrthep ki briew ba nabar.”
Kumba ka seng ka ju dawa ban don ki aiñ ban ïada ïa ka jingrung kyrthep ki briew nabar jylla kum ka Inner Line Permit (ILP) bad khamtam ka jingbym shong shngaiñ ka ri Bangladesh bad ka jingkyndang ka Assam mynta ïa kiba sah beaiñ ka lah ban ktah ïa ka jylla namar kam don ïa ki aiñ ban ïada. Hapoh ka jylla hi kam shym pyntreikam ïa ka jingdawa halor ka ILP ban ïada ïa ka jingrung jingmih ki briew nabar, la ong u Bah Roykupar.
Shuh-shuh, u la ong, “Ngim tip u Bah Hek u kren ïa ka MRSSA ba katno. Katkum ka jingtip jong ka seng, kaba ngi la dep pule ïa kane ka aiñ MRSSA-2016, kam shym don kano- kano ka kyntien ban thoh ba lah ban tehlakam ïa ka jingrung jingmih ki briew nabar.”
Nalor kata, u Bah Roykupar u la kyntu ïa u Bah Hek ba un da pule shwa ïa ka MRSSA-2016, hato ka tehlakam ne em ïa kane ka jingrung kyrthep ki briew nabar?
U la ong ruh ba kim dei ban pynsngewthuh bakla ïa ki paidbah ban ong ba ka MRSSA- 2016 kan tehlakam ïa ka jingrung kyrthep ki briew nabar, hynrei ka MRSSA-2016 ka dei ka bym don bniat bad ngi donkam ïa ka ILP kaba lah ban ïada.
“U Bah Hek u la dei uwei uba la mynjur ïa ka Resolution ban pyntreikam ïa ka Inner Line Permit (ILP) ha u snem 2019, hynrei mynta pat ha ka jaka ba un pynbor ïa ka sorkar ban pyntreikam noh ïa ka, u theh umpjah pynban,” la bynrap u Bah Roykupar.
Kumta u la dawa ruh na ki MLA jong ka ïingdorbar ka Jylla ba ki dei ban leh eiei noh mardor ban pynbor ïa ka Sorkar India ban pynurlong noh ïa ka ILP, namar khlem ka ILP ka MRSSA-2016 kan ym lah ban tehlakam ïa ka jingrung jingmih ki briew nabar.
