Shillong, Naitung 30
Ka Congress kaba la jop 5 ngut ki MLA ha u snem 2023, mynta ka la khuid lut plaiñ hadien ba u Bah Ronnie V Lyngdoh, uba dei u MLA ka Mylliem ruh u la mih noh na ka seng bad leit ban pynïasoh noh sha ka National People’s Party (NPP) ha ka Sngi Balang.
U Bah Ronnie ha ka jingsynran lang ki nong-ïalam ka NPP bad ki nong -kyrshan jong u, u la leit ïakynduh ïa u Lam-phang ka ïingdorbar thawaiñ u Thomas A Sangma ban aiti ha u ïa ka shithi ban pyntip ba u la rai ban pynïasoh noh sha ka NPP kaba ïalam ïa ka Sorkar Jylla.
Da ka jingpynïasoh jong u Bah Ronnie, ka Congress mynta kam don MLA shuh ha ïingdorbar thawaiñ ka Jylla. Ha u snem 2023, ka Congress ka la jop 5 ngut ki MLA. Hynrei ha u snem 2024, u Saleng A Sangma u la shah jied noh kum u MP ka Tura katba lai ngut kiwei pat ba kynthup ïa u Dr. Celestine Lyngdoh MLA ka Umsning, u Bah Charles Marngar MLA ka Mawhati bad u Bah Gabriel Wahlang MLA ka Nongstoiñ ki la pynïasoh sha ka NPP.
Ha kajuh ka por ka jingwan pynïasoh jong u Bah Ronnie ka la pynkiew ïa ka jingbun paid ki MLA ka NPP sha ka 33 ngut ha ka ïingdorbar thawaiñ kaba don 60 ngut ki MLA.
Halor kane ka jingleit pynïasoh sha ka NPP, u Bah Ronnie u la ong ba ka dei ka jingkwah jong ki nongkyrshan bad nongïalam, kaba la dei ka daw na ka bynta ka jingshim rai ka jong u, bad ha kaba ki la kyrpad ïa u ban pynkut noh ka jingïadei bad ka Congress na ka bynta ka jingmyntoi jong ki paidbah jong ka konstitwensi.
U Lamphang ka ïingdorbar, u Thomas A Sangma, u la pdiang ïa ka shithi iehnoh kam kum u nongbat shabuk ne u Opposition Chief Whip ka liang pyrshah bad ruh ban ai ka jingithuh kum u dkhot jong ka NPP.
