Ka Congress kaba dei kawei na ki seng saiñpyrthei kaba la ju ïoh ka jingieit na ki paidbah khamtam ha ka thaiñ nongkyndong ha ki snem ba la leit, mynta ka la khuid war syndon hapoh ka jylla, ha kaba kam don shuh wat tang uwei ruh u MLA, lait noh sa tang u MP na Tura bad lai ngut ki MDC hapoh ka Jaiñtia Hills Autonomous District Council (JHADC). Ha ka ilekshon MLA 2023, ka Congress ka la jop 5 ngut ki MLA bad tang hadien ar snem, kata mynta, ka la duh noh ïa baroh 5 ngut bad na kine, 4 ngut ki la pynïasoh noh sha ka NPP, katba u Saleng pat u la iehnoh kam na ka bynta ka shuki MP.
Dang ha u snem 2024, ki lai ngut MLA ka Congress ba kynthup ïa u Dr. Celestine Lyngdoh, Bah Charles Marngar bad u Bah Gabriel Wahlang, ym tang ba ki la mih bad leit pynïasoh sha ka NPP hynrei ki la ïarap ban pynthaw ‘history’ syndon ïa ka National People’s Party (NPP) ba kan ïoh syndon ïa u ‘Magic Number’ lane 31 ngut ki MLA ha ka Dorbar jong 60 ngut ki dkhot. Ban synshar, kano-kano ka seng saiñpyrthei ne kynhun synrop ki seng saiñpyrthei ka donkam 31 ngut ne palat. Mynta pat ïa kane, la nang pynskhem shuh-shuh da ka jingwan pynïasoh jong u MLA ka Mylliem u Bah Ronnie V Lyngdoh. Kumba ka long, ka NPP kam donkam shuh ïa kiwei pat ki seng saiñpyrthei ban synshar. Ka la lah ban synshar hi dalade. Hynrei ngim tharai pat ba ka NPP kan shu ailad ban khlaiñ ei ka liang pyrshah, bad la ïohi ba wat hadien ba ka la ïoh ïa u ‘Magic Number’ ruh kam shym la weng ïa kiwei pat ki seng saiñpyrthei kiba ïatreilang kum ka BJP, UDP bad HSPDP lem bad ar ngut ki MLA khlem seng.
Kane ka jingrung jong u MLA ka Congress na Mylliem, ïa kaba la pynskhem ruh da u Lamphang ka Ïingdorbar Thawaiñ, ka la pynhiar ïa ka jingdon paid ka liang pyrshah sha ka 9 ngut katba ka liang synshar, kynthup lang ïa u Lamphang bad Symbud Lamphang, ka la kiew sha ka 51 ngut. Ban da dei ha ki snem kiba mynshwa bym pat don jingteh jingkhum ban buh Myntri, tharai ha kane ka Sorkar kin don palat 40 ngut ki Myntri. Hynrei naduh u snem 2004, hadien ba la pyntreikam ïa ka Anti-Defection Law ba la pynkylla, naduh na Sorkar Pdeng bad haduh ki Sorkar Jylla la buh beit thik tang katta ngut ban long Myntri. Kum ha Meghalaya bad kiwei pat ki para jylla barit, ym lah ban don tam palat ïa ka 12 ngut ki Myntri ha ka Sorkar kynthup lang ïa u Myntri Rangbah. Namarkata, ki Myntri Rangbah ki shem jingeh tang ïano ban kynthup bad tang ïano ban weng na ka kynhun Myntri.
Ka jingbun paid jong ka NPP kan pynthikna ruh ba kane ka seng bad u Conrad kin lah ban synshar haduh ba kut jong kane ka san snem mynta, lada kam don jingkylla da kumwei pat. Kiba bun ki khlem poi pyrkhat ba hadien jong lai ngut ki MLA Congress, sa u Bah Ronnie ruh un mih noh bad leit rung sha ka sem jong ka NPP. Wat lada ka NPP ka la shah rem kput ha ka ilekshon MP ha Shillong bad Tura bad kumjuh ban shah rem kput ha ka ilekshon MDC kaba dang shu dep hynrei kat nang ïaid ki por ka nang khlaiñ bad skhem pat da ka jingrung jong ki MLA na kiwei pat ki seng saiñpyrthei. Hato kane ka jingmih noh jong ki MLA, ka pyni ïa ka jingbym ïa beit ha ka rukom treikam hapoh jong kane ka seng khamtam naduh ba u Bah Vincent H Pala u la shah thung kum u President ka Meghalaya Pradesh Congress Committee (MPCC) ha ka All India Congress Committee (AICC) ha u snem 2021? Ka jinghiar jong ka Congress ka la sdang naduh kato ka por, hynrei haduh mynta, ngim pat ïohi ba kita ki heh Congress kiba shong bad sah ha Delhi kin peit mat. Ngim tip lano kin peit mat.
