Shillong, Naitung 30
Ka shi kol ba la thep da u Anineki Pohthmi ka la biang pura ïa ka Lapalang ban pynliem noh ïa ka Laitlulong ha ka quarter final kaba nyngkong jong ka U-20 Fourth Division 2025 ba la pynïaid da ka Shillong Sports Association (SSA) ha ka Sngi Balang ha SSA Stadium, Polo.
Utei u ‘rangïalehkai u la ïoh ban thep ïa katei ka shi kol ha ka minit kaba 56 bad ban ïoh jingjop shisyndon.
Baroh arliang ki kynhun ki la pynkut da kaba ïalehkai mar 10 ngut ki ‘rangïalehkai bad ki la don ar tylli ki jingpynthut na ka daw ka khynñiat bad ka kynjat briew. Uwei na ki ‘rangïalehkai ka Laitlulong u la shah sei da ka red card ha u rephri hadien ka jingïania.
Kane ka jingjop ka la pynlong ïa ka Lapalang ym tang ban ïoh rung sha ka semi final, hynrei ka la kiew ruh sha ka Third Division na ka bynta ka aïom ban wan.
Kumba ka paw ka Lapalang ka la shah pynhiar kyrdan na ka Third Division ha u snem 2024, hynrei tang shi aïom ka la lah ban kiew kyrdan noh.
Ka jingïalehkai quarter final ba ar kan long ha ka Sngi Palei hapdeng ka Mawlynrei SC pyrshah ïa ka Golflink SC ha ka por 3:30 nohphai sngi.
