Shillong, Naitung 30
Ka Seng Samla Lyngïong Pyllun (SSLP) ha ka Sngi Balang ka 30 tarik u Naitung 2025 ka la leit ban buh da ka jingujor sha u Chief Executive Members (CEM) ka KHADC u Bah Shemborlang Rynjah ban ujor pyrshah ïa u Rangbah Shnong (RS) ka Phanñiewnahneng, da kaba kynnoh ba dei namar ka jingai jingbit jong u, ba ki briew ba ïaid Yatra ki sa shna dara sah miet ha u pud u sam jong ka Hima Lyngïong.
Haba kren sha ki lad pathai khubor, u samla Winsonwell Kharryngki kum President ka SSLP, u la kynnoh ba kane ka jingai jingbit jong u Rangbah Shnong ban phah shna dara ïa kitei ki briew ba ïaid Yatra khlem ka jingtip jong ka hima bad ki paidbah.
U samla Winsonwell u la ïathuh ruh ba na ka liang ka Seng Samla Lyngïong Pyllun ka la leit ban ïakynduh ïa u Lyngdoh ka Hima Lyngïong, Bah Hamprey Lyngdoh Ryntathiang ban pan jingshai halor ka jingshna dara kitei ki briew khlem da tip lang ki nongshong shnong hynrei um shym la shim kam haduh mynta.
Haba pyrshang ban ‘phone’ bad ïakynduh markhmat bad u Lyngdoh u la thet-kti beit ba u khlem ai jingbit ban phah shna dara ïa kitei ki briew ha ka jaka jong ka hima. Kumta ngi sngewthuh shai ba kane ka dei ka jingleh donbor jong une u Rangbah Shnong, la ong u samla Winsonwell.
U la pynpaw ruh ka jingbitar da kaba ong, “Ka ophis jong ka hima balei kam shim kam ïa une u Rangbah Shnong, namar ki la kynnoh ba dei ba ai jingbit u Rangbah Shnong ba ïoh shna dara kitei ki briew ba ïaid Yatra.”
U samla Winsonwell u la pynrem jur ïa u Lyngdoh ka Hima Lyngïong ruh, namar um shym la shimkhia ïa kane ka kam bad um nud ban leh eiei ïa une u Rangbah Shnong halor ka jingai jingbit ban phah shna dara ïa kitei ki briew.
Kumta u la ong ba ka SSLP hi kan pyrshah beit ïa ki briew kiba wan ban pynthohbria ïa ka shnong. Da kaba ong ruh ba u Rangbah Shnong uba ai jingbit ban shna dara u dei ban shah sloit noh mardor na ka kam Rangbah Shnong. Shuh-shuh, u la ong ba u Rangbah Shnong u la leh ‘riewkhlaw ban ai jingbit ïa ki briew ba ïaid Yatra ban shna dara ha ka jaka jong ka Hima Lyngïong.
“Ngin ym shong kli-kti, ban leh da kano-kano ka kam na ka bynta ka bha ka miat jong ki paidbah nongshong shnong,” la bynrap u samla Winsonwell.
Namar kata, ka Seng Samla Lyngïong Pyllun ka la kyrpad ïa u CEM ka KHADC ban leh eiei noh kham kloi katba lah bad ban pynshitom katkum ba shah ka aiñ.
Kum ban shu kdew hangne, kitei ki briew kiba ïaid Yatra ki la leit shna dara ha Lyngïong ha ka 24 tarik u Naitung 2025 bad na ka liang ka Seng Samla Lyngïong Pyllun ka la leit ban pyrshah bad pynsangeh mardor ba kin shna ïa katei ka dara.
