Shillong, Naitung 30
Ka Hynñiewtrep Integrated Territorial Organisation (HITO) Shillong City ha ka jingïalam u samla Allan Lyngdoh Nongpiur kum Publicity Secretary, ha ka 30 tarik u Naitung, 2025 ha ka por 11 baje eiei, ka la ïoh ban bat ïa ki katto-katne bar jylla kiba wan na Silchar ha pyrshah ka Civil Hospital, Shillong ki bym don ïa ki kot ki sla kiba biang bad kiba thmu ban wan wad bylla sha kane ka Jylla.
Kumta, na ka liang ki dkhot ka HITO Shillong City, ki la bat bad pynphai noh ïa kine ki bar jylla sha Assam.
Ka HITO ka la buh ka jingmaham ruh ba kino-kino ki briew kiba ju mlien ban khot bylla da ki bar jylla shapoh ka Jylla Meghalaya, ki dei ban pynbiang shwa ïa ki kot ki sla. Ka seng ka ong ruh ba ïa ki kam ba lah ban trei da ki trai ri trai muluk, ki dei ban ai ïa ki bad lada ki wan ïalam da ki nongtrei nabar ka Jylla ruh, ki dei ban pynbiang shwa ïa ki kot ki sla jong kiba wan bylla.
U President ka HITO Shillong City, samla Banpyntngenlang Syiemlieh u la kyrpad ïa ka Sorkar bad kiba ap ha ki khyrdop talasi ba kin shimkhia halor kane ka jingwan rung kyrthep ki briew nabar ka jylla namar kane ka la wanrah shibun ki jingjia kiba shyrkhei hapoh ka jylla lyngba ka jingshim kabu jong ki bar jylla kiba ïoh rung laitlan hapoh ka Jylla.
“Ngi la dep ban pyntip sha ki bor ba dei peit bad ngi kyrpad ïa ki khyrdop talasi ba kin shimkhia haba ïadei bad ka jingrung jingmih jong ki briew nabar namar ha ki khyndiat por kiba la leit ruh, ngi la ïohi shibun kiei-kiei ki jingjia kiba ishyrkhei hangne hapoh ka Jylla jong ngi da ka jingshim kabu jong kine ki bar jylla kiba rung laitlan hangne ha Jylla jong ngi,” ong u samla Banpyntngenlang.
U la ong ruh ba ka seng kan ym shongthait satia hynrei kan ïai trei borbah ban buddien step bad miet, bad ong ba lada ka Seng ka dang lap biang ïa kum kane kajuh ka jingjia, na ka liang ka Seng kan pynphai beit ïa kitei ki briew sha ka jaka kaba ki wan.
