Shillong, Naitung 30
U Lamphang ka Ïingdorbar Thawaiñ ka Jylla, u Thomas A. Sangma ha ka Sngi Balang u la pdiang ïa ka shithi pynïasoh bad u la ithuh ïa u nongmihkhmat ka Mylliem, u Bah Ronnie V. Lyngdoh kum dkhot jong ka National People’s Party (NPP).
“Nga la ïohpdiang ïa ka shithi iehnoh kam jong u Bah Ronnie V. Lyngdoh na ka kam ‘Chief Whip’ jong ka liang pyrshah. Nga la ïoh ruh ïa ka shithi jong u kaba kyrpad ïa ka jingpynrung bad jingpynïasoh bad ka National People’s Party. Nga la lap ba ka aplikehson jong u ba ka long kaba ïaid beit ïaid ryntih bad nga la pdiang ïa ka shithi jong u kaba kyrpad pynïasoh bad ka NPP,” la ong u Sangma haba kren sha ki nongthoh khubor.
“Nga la soi ruh ïa ka hukum ba namarkata la kheiñ ïa u kum u dkhot jong ka NPP,” u la bynrap.
U Bah Lyngdoh u la ïakynduh ïa u Lamphang ka Ïingdorbar Thawaiñ ha ka por kumba 12:30 eiei mynsngi, ha kaba la synran lang ïa u da ki bahaïing bahasem, ki nongkyrshan, u Symbud Myntri Rangbah ka Jylla, u Bah Sniawbhalang Dhar, lem bad kiwei-kiwei ki nongïalam bad ki nongtrei ka NPP. Ha ka shithi sha u Lamphang, u Bah Lyngdoh u la pynsngew ruh ba um kwah shuh ban buddien ïa ka ‘Petition’ (ban pynduh jinglong dkhot ïa ki lai ngut ki MLA barim ka Congress naba ki phet sha ka NPP) ha Meghalaya High Court.
Haba jubab ïa ki jingkylli shaphang ki jingshah ktah ha ka aiñ ne ki jingpyrshah kiba lah ban mih, u Lamphang u la ong, “Nga la shim ïa ka rai jong nga katkum ka aiñ. Uno-uno u long uba laitluid ban pynpaw ïa ki jingpyrshah, bad lada mih kino-kino ki jingeh ha ka aiñ, ka shong ha ka ïingbishar ban rai. Kumba ka long mynta, nga la ai ïa ka rai jong nga bad nga la ithuh ïa u Bah Lyngdoh kum u dkhot ka NPP.” Ïa kane ka jinglong-jingman ha ka saiñ pyrthei la sakhi kum ka jingkyntiew ïa ki jingpyrshang jong ka NPP ban tehsong ïa ka nongrim jingkyrshan jong ka ha ka Jylla.
