Nongpoh, Naitung 30
U Chancellor jong ka skulbah University of Science & Technology Meghalaya (USTM) u Mahbubul Hoque ha ka Sngi Balang u la ai jingpynshai paidbah ba ka skulbah ka la pynsangeh noh shwa shipor ïa ka jingthmu ban ai jinghikai ei sha ki khynnah rit kiba dei na ki longïing kiba shah beh na ka jylla Assam hadien ka jingpyrshah na kiba bun ki liang.
Kum ban shu kdew, hadien ba u Mahbubul Hoque u la thoh ha ki social media ba lyngba ka ‘Mission Educational Rehabilitation’ ka ban sa plie paidbah shen kan ïarap ïa kito ki khynnah rit kiba stad bad donsap, ki bym don ïing don sem kiba la shah beh na ki jaka jong ka Sorkar Assam, ka la pynlong ïa kiba bun ki seng na ka jylla ban pyrshah jur ïa ka jingthmu jong katei ka skulbah.
Haba pynshai, u Chancellor ka skulbah u la ong, katei ka jingthoh kaba u pynmih ha ki social media, nyngkong kiba bun ki ai jingïaroh, hynrei ki don pat kiba ïalam bad pynsngewthuh bakla ïa ki jingmut jong kitei ki jingthoh ki jong u bad namar ba ka jingthmu ka jong u ka long ban kyntiew ïa ka pule puthi bad ban nym pynthohbria, u la rai ban pynsangeh noh ïa katei ka jingthmu.
U la ong ruh ba ha ka jingshisha katei ka jingthmu kam dei satia ban pynsah lane ai jaka rieh ïa ki longïing ki bym dei nong India lane kita Bangladeshi, hynrei ka jingthmu hi ka long ban ai tang ïa ka pule puthi na ka bynta ki khynnah rit kiba kham stad bad don sap bad kiba dei ki nongshong shnong ba pura jong ka ri India kiba la shah pynpra noh ïa ki ïing ki sem kiba sah beaiñ ha ki jaka jong ka Sorkar Assam. U Mahbubul Hoque u la ïathuh ba kumba u sdang ïa kane ka skulbah lyngba ki kamra klas kiba rit bad poi haduh kane ka thong, ka jingthmu ka jong u hi ka long ban ai jingïarap kyrpang na ka bynta kito ki khynnah kiba stad bad kiba wan na ki longïing kiba duna ha ka ïoh ka kot khlem da kheiñ la ki dei na kano ka niam, jaidbynriew ne ka jylla.
U Hoque u la ban jur ruh ba ka USTM hi kan ïai bteng ban ai ïa ka jingshakri kaba paka tam ha ka pule puthi kaba khlem shah liang bad ban pynthikna ba ki samla pule kiba dei hok, kin ym duh ïa ka jingpule ka jong ki. Ka skulbah kan ïai bteng ïa ka mission jong ka ban kyntiew ïa ka pule puthi wat lada ka la pynsangeh shwa shipor ïa kane ka jingthmu, u la bynrap.
