Khliehriat, Naitung 30
Ka Khliehriat West FC bad ka Khliehriat East YWSC kiba la long kiwei pat kiba la lah ban pynthikna ban jam sha ka quarter final ha ka lympung ïalehkai 2nd Division Football Tournament 2025 ba la pynïaid da ka East Jaiñtia Hills District Football Association (EJHDFA) ha ka Sngi Balang ha madan artificial turf Diengshynrum, Khliehriat.
Ha ka jingïakhun ba nyngkong, ka Khliehriat West FC ka la pynjem khnap ïa ka Moopynieng SCSO da 7-0. U Arlangki Sutnga u la thep marwei haduh 5 kol ha ka minit 10, 20, 34, 47, bad 61, katba ïa kiwei pat la pynbud da u Daoshwa Chyrmang (22) bad Jesperly Pohleng (72).
Ha ka jingïalehkai kaba bud, ka Ïapmala United SC ka la jop da 2-0 kol ïa ka Lumputhoi SC. Kane ka la wan urlong lyngba ki kol ba la thep da u Spain Lamo ha ka minit kaba 19 bad Arly Lamo (33).
Ha kawei pat ka jingïalehkai hapdeng ka Khliehriat East YWSC bad Kairang CSC ki la kut ha ka jingïakhaid mar 1-1 kol. Ïa ka kol jong ka Kairang la thep da u Pyrshang Sutnga (17), katba ka Khliehriat East YWSC ka la pynïakhaid lyngba ka penalty ba la shut da u Mihsalan Langstang (72).
Te kumta ka Khliehriat West bad ka Khliehriat East ki la ïasoh lang bad kiwei pat ki kynhun kiba kynthup ïa ka Mulieh YWSC Suchen, Moosiang Lamare Old SC, Lakadong Umlatdoh SSC, Diengshalalu SC, Umlyngsha Youth SC bad ka Lumshnong YWSC ban jam sha ka quarter final.
