Imphal, Naitung:
Ki bor pahara ha Manipur ki la kem ïa ki katto katne ngut ki briew kiba la shah kynnoh ba ki don ka jingïadei bad ki kynhun lehnoh bad ki kynhun runar ha ki jingkhynra ba kyrpang ba la pynlong ha kylleng ki distrik jong ka Imphal East bad West ha ka 28 bad 29 tarik, Naitung.
Ha ka 28 tarik, Naitung, ki bor pahara ki la ïoh ban kem ïa u Md. Samir Khan ïa uba la tip ruh da ka kyrteng kum u Inao (45) na Kairang Umang Mayai Leikai kaba hap hapoh Heingang Police Station, Imphal East. La ïathuh ba u Khan, u dei u dkhot jong ka kynhun runar, kaba la tip kum ka ‘Ningolmacha’.
Ha ka jingkhynra ba kyrpang ha katei ka juh ka sngi, uwei pat u briew uba la tip kyrteng kum u Thiyam Boynao Singh (47), u dei u dkhot jong ka seng ba la shah ñiew beaiñ ka Kangleipak Communist Party (KCP (PWG)), la kem ïa u na Haokip Veng hajan ka rud wah Mahabali East ha Imphal. La ïoh kurup ïa kawei ka Aadhaar card na u ha ka por ba u la shahkem.
Da kaba bteng ïa ka jingpyntreikam pyrshah ïa ki lehnoh bad ki nongdawa pisa, ki bor pahara ki la pynlong ïa ka jingkhynra kaba ïatreilang ha ka 29 tarik, Naitung, kaba la pynlong ban kem ïa arngut ki dkhot jong ka kynhun KCP (KCP (MFL).
U Khaidem Nongpoknganba Singh na Lamlai Mayai Leikai, Imphal East, u la shah kem na Nongada Awang Leikai hapoh ka Lamlai PS. La ngeit ba u donkti ha ka jingïasiat kaba la jia ha ka miet jong ka 10 tarik, Naitung ha ka shnong Napet Palli, kumjuh ruh ha ka jingbuhrieh bad kit tiar ïaleh na ka bynta katei ka kynhun ba la shah ñiew beaiñ.
La kem ïa u Thounaojam Ashokumar Singh na Leiphrakpam Mamang Leikai, Thoubal distrik, hadien ka jingphla jong u Nongpoknganba, na Langthabal Kunja hapoh ka Singjamei PS ha Imphal West.
Ki bor pahara ki la pynjur ïa ki jingpyntreikam ban ïakhun pyrshah ïa ka jingdawa pisa bad ki kam lehnoh ha kylleng ka thaiñ ban pynduhjait ïa ki jingma kiba mih na ki kynhun ba ju kyrshan ïa ki lehnoh. Ki bor synshar ki la pynpaw biang ïa ka jingkular jong ki ban pynthikna ïa ka jingshngaiñ jong ki nongshong shnong da kaba pynduhjait ïa kum kine ki jinglong lyngba ki kam ba la thmu ba la pynshong nongrim na ka jingïoh jingtip kaba bniah.
