Shillong, Naitung 30
Ka Madan SC ka la pynliem noh ïa ka Kharang SC da 4-1 kol na ka bynta ban ïoh jingjop ha ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA) ha ka Sngi Balang.
Kane ka nam jop ka la wan urlong lyngba ki ar kol ba la thep da u Thauggoulun Vaiphei bad u Phermanbha Lyngdoh na ka bynta ban pynlong ïa kane ka klob ban jam sha kliar duh jong ka Group-C wat lada ka ïaryngkat mar 7 point bad ka Ïaitylli, kaba la hiar sha ka kyrdan ba-ar.
Ha kane ka jingïakhun kaba la long ha SSA Stadium, baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban pynkhih jar haduh kaba kut jong ka kylla step.
Haduh katto-katne por ba la bteng ïa ka jingïakhun jong ka kylla miet, ka Kharang ka la ïoh ïa ka kabu kaba biang ban thep kol nyngkong eh lyngba u Robenson Warlarpih ha ka minit kaba 50. Hadien 5 minit ka Madan ka la pynïakhaid kylla lyngba u Vaiphei bad ïa ka kol kaba ar da u Phermanbha (75).
Ha shwa ban wai u Phermanbha (75) bad u Vaiphei (85) ki la pynbud biang sa mar shi kol na ka bynta ban pynlong ïa ka Madan ban ïoh shisyndon ïa ka jingjop.
Haba phai sha kawei pat ka jingïakhun jong ka Group-D hapdeng ka Mawkriah West SC bad ka Umïew Maw U Sam ki la ïakhaid mar 1-1 kol.
Ka Umïew ka la pynkhih jar nyngkong eh lyngba u Bilistar Sun ha ka minit kaba 47, hynrei ka Mawkriah ka la pynphai kylla lyngba u Kiewdorkang Kyrsian (74) na ka bynta ban ïakhaid mar shi kol.
Ka jingïalehkai jong ka Group-B ha ka Sngi Palei kan long hapdeng ka Umrynjah pyrshah ïa ka Lumparing ha ka por 1 baje mynsngi.
