Shillong, Naitung 31
Ka Meghalaya Swimming Association (MSA) ka la sei haduh 11 ngut ki khynnah ïalehkai jngi ban mihkhmat ïa ka Jylla sha ka 41st Sub-Junior Natio-nal Swimming Champion-ship 2025 ka ban long ha Bengaluru bad ka 51st Junior National Swim-ming Championship 2025 ka ban long ha Ahmedabad.
Ki 2 ngut khynnah ban leit shim bynta ha Benga-lore ka ban sdang naduh 4 haduh 5 tarik u Nailar ki long ka Keanan Chugim Nongrum Momin bad ka Anisha Phanbuh, katba 9 ngut pat ban leit shim bynta sha Ahmedabad ka ban long naduh 3 haduh 7 tarik u Nailar ki long u Elberz W Kharbani, Shaun Maxwell Diengdoh, Wahshan Ïa U Allya, Elhanan Kharwar Rumnong, Meïai Pynsan Lyngdoh Tron, Verem Gadaliah Nongsiej, Em-I Rta Ksoo, Mechwa Na I Nikhla Siangshai bad u Synrang Batngen Marbaniang.
Ha shwa ba kin mih na kane ka nongbah, na ka liang ka MSA ka la pynlong ïa ka jingïakynduh lang bad ki khynnah ryngkat ki kmie ki kpa ha ka Sngi Palei ha pung Crinoline, Shillong na ka bynta ban ai ki kyntien kitbok-kitriang ryngkat kyrkhu-kyrdoh ïa ki khynnah ba kin ïalehkai bha ha kitei ki jingïakop khnang ba kin nangkiew shaphang ha ka kam ïalehkai ka jong ki.
Haba ai jingkren ha katei ka sngi, u Baika R. Lyngdoh, General Secretary ka MSA u la ai khublei ïa ki kmie ki kpa jong ki khynnah kiba la don ryngkat lang na ka bynta ban ai mynsiem ïa la ki jong ki khun ha shwa ba kin mih ban leit sha kitei ar tylli ki jingïakob. “Ka long ka jingkmen kaba khraw ba phi la ïadon lang ha kum kane ka por kaba lyngkot bad ka jingdon ryngkat lang ka jong phi kan ïarap ban nang ai mynsiem ïa ki khun jong phi khnang ba kin nangkiew shaphrang ha ka kam ïalehkai jong ki.”
Ha kajuh ka por u la kyntu ïa ki khynnah ba ki dei ban don ïa ka mynsiem ïakhun haba ki ïashim bynta ha ki jingïakob shabar na la ka jong ka Jylla. “Phi dei ban don ka mynsiem ka jingïakhun ban ym ailad, kam pher la ki lah ban long kiba jrong ne heh briew.”
La ïoh ruh ki jingkren na u Vice President Bah Kenneth Wahlang ryngkat ka jingdon lang u Technical Director Bah Joe Marweiñ, Treasurer Bah Maximillon Lyngdoh bad kiwei-kiwei.
