Nongpoh, Naitung 31
U MLA ka Jirang Konstitwensi, Bah Sosthenes Sohtun haba shimkhia halor ka jingma kaba ap na ka jingwan rung kyrthep jong ki bar jylla kiba shah kyndang na ka jylla Assam, ha ka Sngi Palei u la shong jingïalang bad ki Rangbah Shnong kiba hap hapoh ka Synjuk Ki Rangbah Shnong Byrni-hat Area ban ïathir bad ïatai halor kane ka mat kaba dei ka kam ïap kam im jong ki paidbah nongshong shnong ka thaiñ.
Haba kren sha ki lad pathai khubor hadien ka jingïalang, u MLA u la pynpaw ba kane kam dei satia ka mat kaba tang ma u kum u nongmihkhmat u da sngew-khia, hynrei haba wat ki paidbah nongshong shnong ruh ki sngew kumjuh, khamtam kumba kitei ki shnong hi ki dei kiba don ha ki thaiñ khappud bad ka jylla Assam.
U Bah Sosthenes u la ong ruh ba hadien ba ka Sorkar Assam ka la beh noh ïa ki briew kiba sah beaiñ ha ki jaka Sorkar, ka jingma kaba ap ka long ba ïoh lehse kitei ki longïing bad ki briew kiba shah beh na ka jylla Assam, kin wan ban rieh tngen bad phet sha jylla Meghalaya khamtam ha kine ki shnong khappud kum ha ki thaiñ Byrnihat bad kiwei kiwei de.
U la kyntu ruh ïa ki nongïalam shnong ba kin long kiba peitngor ha la ki shnong ban pynthikna ba ki bar jylla kiba lah ban wan rung kum ki nongtrei bylla sngi, ki nongshongwai bad kiba lah ruh ban pynïadei paralok bad ki nongshong shnong, ba kim dei satia ban ïohlad naba kane kan sa buh jingma hi ïa ka thaiñ baroh kawei.
Kumta kum u nongmihkhmat, u Bah Sosthenes u la kyntu jur ïa ki nongïalam shnong kiba don ïa ka bor kaba khlaiñ hapoh ka shnong ka thaw ka jong ki bad kin shimkhia ïa kane ka mat bad kyntu ruh ïa ki trai ïing ba aiwai ïing ba kin ai ïa ka jingïatreilang ryngkat ryngkat bad ki nongïalam shnong na ka bynta ban wanrah ïa ka imlang ka sahlang kaba suk bad kaba shngaiñ.
