Khliehriat, Naitung 31
Ka Confederation of Meghalaya Social Organisation (COMSO), Jaiñtia Region ha ka 31 tarik u Naitung ka la ïakynduh ïa u Deputy Commissioner ka East Jaiñtia Hills District u Sivansh Avasthi, IAS, ban dawa khynra ïa ki briew kiba nabar kiba wan buhai shnong hapoh ka thaiñ East Jaiñtia Hills da kaba ïatreilang bad ka COMSO Jaiñtia Region khnang ban khanglad ïa ki briew nabar ban wan buhai shnong beaiñ sha ka thaiñ khamtam ïa ki nong Bangladesh.
Ka COMSO Jaiñtia Region ka la ong ba ka jylla Assam ka dang pynlong ïa ka jingkhynra bad beh ïa ki bym dei ki nong India ban leit phai sha ki jaka ba ki wan bad ka jylla Assam kam shah shuh ïa ki bym dei ki nong India ban shong ban sah hapoh ka jylla Assam. Kumta kito ki briew kiba ka jylla Assam ka la beh ki lah ban pynlong jaka rieh tngen sha ka thaiñ East Jaiñtia bad ban wad jaka ban shong ban sah shapoh kane ka thaiñ.
Ka COMSO Jaiñtia Region ka la pynkynmaw ruh ba dang ha kine ki sngi ba la dep ka Union Ministry of Home Affairs ka la dep bthah sha baroh ki jylla ban thaw da ka Special Task Forces (STF) na ka bynta ban peitngor ïa ki briew kiba nabar ka India kiba thmu ban rung beaiñ shapoh India, hynrei haba ïakren bad u DC ka East Jaiñtia Hills u la ïathuh ba na ka liang jong ka jylla kam pat phah ban thaw ïa kata ka STF hapoh ka District katkum ba long mynta.
Na ka liang u DC u long uba kloi ban ïatreilang bad ka COMSO na ka bynta ka jingbha jong ka District khamtam ban khanglad ïa ki bar ri ban rung beaiñ shapoh ka District.
U la ong shuh shuh ba un sa khot jingïalang ïa ki Waheh Chnong kiba don hapoh ka thaiñ East Jaiñtia bad ruh ïa ki sahep Sorkar ban wad lad kumno ban khanglad ïa ki briew kiba nabar ban rung beaiñ shapoh ka district bad ban wad lad ruh ban pynlong ka jingkhynra ha katto-katne ki shnong kaba ki bar ri ki lah ban rieh tngen da kaba ïatreilang bad ki Waheh Chnong jong ka thaiñ.
