Nongpoh, Naitung 31
Ha kawei ka jingjia hynnin ka sngi, uwei u nonghikai skul ba la tip kyrteng kum u Noreshor Timung, 28 snem ka rta na ka shnong Garo Banga (Amreng), kaba don ha ki thaiñ khappud jong ka Meghalaya-Assam hapoh ka Jirang konstitwensi, u la shah kem ha ki bor pahara jong ka tnat Forest ka jylla Assam ha ka shnong Umshalini bad shah bom dusmon haduh ba ka met ka phad bad ki bynta jong ka durkhmat ki la jngem bad mong.
Katkum ka tyllong khubor ba la ïoh lum, la ïathuh ba katei ka jingkem jong ki bor pahara ka tnat Forest jong ka jylla Assam ka dei ha ka por kumba 2 ne 3 baje eiei janmiet bad khlem da pynshai satia halor kaei ka nongrim ba ki kem, ki bor pahara ka tnat Forest ka jylla Assam, ki la kit noh ïa utei u nonghikai skul sha Lokhra bad bom dusmon ïa u.
La ïathuh ba na ka liang ki bahaïing bahasem jong utei u nonghikai skul lem bad ki paidbah nongshong shnong kiba la sakhi ïa katei ka jingjia, ki la pyrshang ban buddien bad dawa ban pyllait ïa utei u nonghikai skul, hynrei la kynnoh ba ki bor pulit bad nongtrei jong ka tnat Forest ka jylla Assam ki la ktah kti lang ruh ïa ki.
Tang mar shu ïoh jingtip halor kane ka jingjia, na ka liang jong u MLA ka Jirang u Bah Sosthenes Sohtun u la shimkhia mardor ban ïakren bad u Deputy Commissioner bad Superintendent of Police jong ka Ri Bhoi District ba kin tuklar bad pynbeit mardor ïa katei ka kam bad ki bor ba dei khmih ka jylla Assam, khamtam ban pyllait noh ïa utei u nonghikai skul uba la shah rah bad shah bom dusmon khlem kano-kano ka daw.
U Bah Sosthenes Sohtun u la ïathuh ba tang hadien katto-katne por, u la ïoh jingtip ba ki bor pynïaid District ka Ri Bhoi ki la dep ban pynbeit ïa katei ka kam bad ïa utei u nonghikai la pyllait noh hynnin hi ka miet.
Kumba ka jingïakren pynbeit ïa u pud u sam ka dang dep tang ha ka wat ba nyngkong bad ki dang don kiba sahteng, u Bah Sosthenes Sohtun u la pynpaw ïa ka jingsngewkhia jur halor kine ki jingjia kiba ktah ïa ka shongsuk shongsaiñ jong ki paidbah nongshong shnong ka konstitwensi ka jong u, kiba dei ha ki thaiñ khappud jong ka jylla bad ka Assam kiba ju jia na ka por sha ka por.
Halor kane ka bynta, na ka liang jong u Bah Sosthenes u la buh jingkyntu ïa ki bor pynïaid District ka Ri Bhoi bad ruh khamtam ïa ka Sorkar Jylla ba ki dei ban shimkhia ban ïakren bad ki bor Sorkar jong ka jylla Assam ban pynthikna ba kum kine ki jait jingjia kim dei shuh ban jia nangne shakhmat.
