Gaza, Naitung:
Katkum ki khubor, la ong ba ka jing leit hiar thma jong ka Israel sha nongbah Gaza ha ka Sngi Balang, ka la shim ia ka jingim jong 46 ngut ki ‘riew paidbah kiba dang leit wad bam ha katei ka miet, wat la ka Israel ka la mynjur ban pynjai-jai ia ka jing-iasiat bad ban ailad ia ka jingsam marbam sha ki paidbah nongshong shnong.
Ka Israel ka la wan hapoh ka jingpynbor kaba jur bha na ki ri ka pyrthei ha kine ki sngi ba la dep, namar ka jinghiar thma bad jingkhang khyrdep jongka kaba dang ïaid shakhmat ka la wanrah ïa ka “jingjia kaba sniew tam jong ka jingkyrduh bam” ha katei ka nongbah Gaza kaba don sha ki thaiñ rud duriaw, kaba don kumba 2 million ngut ki nong Palestine.
U Witkoff, uba la ïalam ïa ka jingpyrshang jong ka sorkar u Trump ban pynsangeh ïa ka thma kaba la jan dap 22 bnai bad ban pyllait ïa ki nongshah rahbor ha ka jinghiar thma jong ka Hamas ha ka 7 tarik u Risaw kaba la wanrah ïa ka thma kaba jur hapdeng ka Hamas bad ka Israel, u la leit poi sha Israel ha ka Sngi Palei naka bynta ban ïakren halor ka jinglong jingman ha Gaza.
Uwei pat u heh jong ka U.S. u la pynthikna ia katei ka jingleit, da kaba kren khlem da kwah ban pynpaw kyrteng ban iakren ia ki jingthmu ki bym pat pynpaw paidbah.
Napdeng kito kiba la khlad noh ha katei ka jingleit thombor ba dang shen jong ka Israel, kumba 30 ngut ki dei kiba dang leit wad jingiarap, katkum ka jingiathuh jong ki hospital kiba la pdiang ia ki met iap bad kiba la sumar ia ki phew ngut ki briew kiba la mynsaw.
Ki shipai Israel kim shym la kren eiei halor katei ka jingleit thombor ha katei ka miet, hynrei ka la iathuh ba ki shipai Israel ki thmu tang ia ki lehnoh bad ka Israel ka la kynnoh kylla ia ka Hamas halor ka jingiap bad jingduh ei ia ki mynsiem briew namar ba ki lehnoh Hamas ki leit tur khnang bad leit wad jaka rieh ha ki jaka ba shong ki riew paidbah.
