Shillong, Naitung 31
U National Working President ka National People’s Party (NPP), u James Sangma, u la pynpaw ïa ka jingpyrshah kaba jur halor ka jingshah ñion beiñ, ka jingshah thombor bad ka jingshah kem be-aiñ jong ar ngut ki sister ka Balang Katholik ha Chhattisgarh.
U James ha ka rynsan X u la ong ba kine ki kam kiba shyrkhei ki long kum ka jingthmu ban pynshitom bad pynpra ïa ka jinglong laitluid bad ka synshar paidbah jong ka ri India.
Ha ka jingthoh ba la thoh ha ka rynsan X, u James Sangma u la ong ba ka NPP ka pynrem jur ïa kane ka jingshah pynshitom bad ka jingshah kem jong kine ar ngut ki sister ha ka jingshah kynnoh da ki kam bym don nongrim. Kine ki kam kim dei satia ban shah pdiang ha ka imlang-sahlang kaba synshar da ka riti synshar paidbah bad kaba burom ïa ka jingngeit jong baroh.
U James u la ong ruh ba kane ka pyni ka jingbym kheiñ ïa ka jingnoh synñiang kaba khraw jong ki Missionary Khristan ha ki spah snem kiba la leit noh sha ka pule puthi, ka koit ka khiah bad ka roi ka par jong ki jaidbynriew rit paid hapoh ka ri.
Shuh shuh, u James u la ong ruh ba ka jingthombor ïa ki niam bad ka jingleh pyrshah ïa ki paidbah kiba im ha ka jingsuk bad jingshakri, kim dei tang ki kam kaba ktah ïa ka aiñ bad ka jingpynïaid hok, hynrei ki dei ruh ki jingkheiñ beiñ ïa ki jingïatreilang kum ka imlang sahlang bad ka riti synshar paidbah.
U James u la ong ruh ba ka National People’s Party ka kyrpad ïa ka Sorkar Chhattisgarh ba kan pynlong da ka jingtohkit ha ka rynsan bishar kaba laitluid bad kaba khuid, ban pynshitom ïa kito kiba donkti ha kane ka kam, khlem da khmih ïa ka jingïadei jong ki badno-badno ha kano-kano ka bynta.
Ka NPP ka kyntu ruh ïa ka Sorkar Pdeng bad ïa ka National Commission for Minorities ba kin shimkhia da ka suo-motu ban pynneh pynsah ïa ka jingshngaiñ jong ki ritpaid bad ban khanglad ïa kum kine ki jingjia ba kin dang jia shuh-shuh. Ka jingïar bha jong ka India ka don ha ka jingïatreilang jong ki niam bapher-bapher, bad ka jingthombor ïa ki rit paid rit niam ka ktah eh ïa ka mynsiem jong ka ri.
