Shillong, Naitung 31
U Managing Director jong ka JETS 24*7, Bah Pynskhemlang W. Uriah ha ka Sngi Palei ka 31 tarik u Naitung 2025 u la leit ban buh da ka dorkhas sha u Chief Secretary ka Sorkar Jylla u Bah D.P. Wahlang halor ka jingmih ki nongkamai arshaka be-aiñ.
Ha kane ka dorkhas, u Bah Pynskhemlang u la pynsngew ha u Chief Secretary Bah D.P Wahlang ha kaba ïadei bad ka jingmih ki nongkamai arshaka ha ka jylla ha ka kyrteng jong ka Rapido bad halor ka jingbym shimkhia bad bym leh eiei ka tnad Transport ka Sorkar Jylla halor kane.
Haba ïakren bad ki lad pathai khubor, u Bah Pynskhemlang W. Uriah u la ïathuh ba watla na ka liang jong ki, ki la ujor man ka por sha ka tnad Transport halor ka jingmih ki nongkamai arshaka be-aiñ ha ka jylla kaba long ka jingpynkheiñ ïa ka kyndon hapoh ka Meghalaya Taxi Aggregator Operational Rules 2020 Rule 3 sub-section (1), hynrei kim shym la leh eiei haduh mynta ruh.
Ka kynhun ka la pynsngew sha u Bah D.P. Wahlang ba ka Sorkar Jylla ka dei ban leh da kaba tyngeh, da kaba khang noh ïa ka Bike Taxi Aggregator be-aiñ ha ka kyrteng jong ka Rapido kaba kamai khlem lisen ha ka jylla Meghalaya kaba pynkheiñ bad kaba knieh noh ïa ka pliang ja jong ki trai jylla kiba im jakpoh da kaba kamai arshaka, la ong u Bah Pynskhemlang.
U la ïathuh, ba ka jingïakynduh ïa u Chief Secretary ka long ban pynkynmaw biang ïa ka sorkar ban khang noh ïa ka ‘App’ jong ka Rapido lyngba ka Geo Fencing, namar kumba ka long mynta ka jingkamai Rapido ka ktah pat ïa ka JETS 24*7 kaba la ïoh lisen na ka Sorkar Jylla.
Kumta u la kyrpad ïa u Chief Secretary ban tuklar lem halor kane ka kam khnang ba kan long ka jingmyntoi ïa kiba kamai ha ka jylla.
Nalor kata, u la ïathuh ba na ka liang u Chief Secretary u la kular ban khot da ka jingïalang ha kine ki khyndiat sngi ïa u Commissioner and Secretary ka tnad Transports bad ïa ka Deputy Commissioner ban ïakren sani bha halor kane.
