Shillong, Naitung 31
U Nongïalam ka Liang Pyrshah, Dr. Mukul Sangma, u la kyntait ban kynthoh halor ka jingkynnoh ïa ka jingbym lah bad pheil jong u Bah Vincent Pala kum u nongïalam kaba la wanrah ïa ka jingmih noh jong saw ngut ki MLA ka Congress bad ban leit pynïasoh sha ka National People’s Party (NPP).
Haba kren sha ki nongthoh khubor ha ka Sngi Palei, u Dr. Mukul u la ong ba mynta ka shong ha ki paidbah ban bishar bad ban shim ïa ka jingsngew shimet jong ki halor ka jinglong-jingman kaba mynta.
“Nga sngew, ba ngan ym kynthoh eiei halor kane (jingïalam u Bah Pala) namar ba ka shong ha ki paidbah ban bishar bad ban shim ïa ka rai. Nga don ka burom kaba khraw ïa manla u nongmihkhmat bad u nongïalam, namar ki long nongïalam ha ka bor ba ki don,” u la ong.
Haba pynpaw ba ka jingmyntoi jong ka jylla ka long kaba kham khraw ban ïa ka constituency shimet, bad ba ka lawei jong uwei-pa-uwei hapoh ka jylla ka don ka jingïadei, u Dr. Mukul u la ong, ka la dei ka por ba ki paidbah kin sdang ban pyrkhat thymmai ha kaba jied nongmihkhmat, ki ban buh hakhmat ïa ka bha ka miat jong ka jylla hi baroh kawei.
Haba kylli, hato ka Congress ka dei ka lieng ba la ngam? U Dr. Mukul u la kyntait ban kynthoh eiei bad ong ba ym don kawei ruh ka seng saiñpyrthei kaba dei ka lieng kaba ngam.
U la ong ba manla ki seng saiñpyrthei ki mad ïa ka jingkiew bad jinghiar bad ba ka shong pat ha ki paidbah ban rai ba kano ka seng kaba lah ban ïada ïa ka hok jong ki.
“Phi la ïohi shibun ki seng saiñpyrthei ha Meghalaya. Peit ïa ka HSPDP, ka la don da ki phew snem, bad ka dang neh haduh mynta. Te kin don ki por ba kin hiar ha ka jingdon ki MLA bad kin don ki por ba kin kham don bun. Phi ïohi ïa ka NPP ba ha u snem 2013 ka don tang ar ngut ki MLA,” u la ong.
U Dr. Mukul u la pynpaw ïa ka jingngeit ha ka jingstad jong ki paidbah ka jylla Meghalaya, da kaba ong ba kin sa pyni ïa ka jingstad jong ki ha ka por ba kin jied ïa la ki nongmihkhmat.
Katkum ka jingong jong u, ka por kan sa batai kano ka seng kaba lah ban kyntiew shabar na ka jingïaleh kaba ïoh jingmyntoi shimet bad ban long kaba shisha ban shakri ïa ka jingmyntoi jong ki paidbah.
