Khliehriat, Naitung 31
Ka karkhana Star Cement ka dei kawei na ki karkhana pynmih dewbilat kaba la ïaid shakhmat kaba don hapoh East Jaiñtia Hills District bad kaba don ïa ka karkhana treikam jong ka ha ka shnong Lumshnong, hynrei kane ka karkhana katba nang mih ki sngi ka leh bym suitñiew ïa ki aiñ kiba ïadei bad ka mariang.
Halor kane, ka Khasi Students’ Union (KSU) Lumshnong Unit ka la pynpaw ka jingsngewkhia kaba jur namar kane ka jingpyllait lyer jakhlia jong kane karkhana ym tang ba ka pynjakhlia ïa ka lyer pynban ka ktah ruh ïa ka koit ka khiah ki nongshong shnong sawdong kane ka karkhana.
Ka KSU ka la pynpaw ba kane ka karkhana ka la leh bym salia ïa ki aiñ ïada na ka jingpynjakhlia ïa ka lyer bad ka um ka wah bad ki nongshong shnong ka thaiñ Lumshnong ki hap ban im ïa ka jingim kaba syrtok ban ring pynhiar mynsiem ïa ka lyer jakhlia kane ka karkhana.
Lah ban pynkynmaw ba ka Meghalaya State Pollution Control Board (MSPCB) ha u Nohprah 2024 ka la pynmih ïa ka hukum pyrshah ïa ka karkhana dewbilat, ka Star Cement Limited ba ka dei ban siew ïa ka bai lutksan kaba T. 120,000 namar ka jingpynkheiñ kaba da thmu ïa ki kyndon Section 21 jong ka Air (Prevention & Control of Pollution) Act, 1981 bad Section 25 bad 26 jong ka Water (Prevention and Control of Pollution) Act, 1974.
Ïa kane ka hukum la pynmih hadien ba ka Board ka la lap ba ka Star Cement ka la pynkheiñ ïa ki kyndon pynmih ïa ka lyer jakhlia na ki shnat (unit) jong ka ha utei u snem bad ka la lap ruh ba ki kor peit bniah ïa ka jingpynmih lyer jakhlia (Online Continuous Emission Monitoring Systems) jong ka karkhana ki long ki bym treikam.
