Shillong, Naitung 31
Ha ka nohphai sngi jong ka 31 tarik u Naitung 2025, ki dkhot ka Khasi Students’ Union (KSU) na Laban Circle bad Upper Shillong Circle ki la leit ban pynpra ïa ki ïingsah be-aiñ ki poiwir kiba dang tei thymmai ha Mahadev Khola.
Hadien ba ki dkhot ki la dep ban pynpra ïa kitei ki ïing kiba dang mut tei thymmai jong ki poiwir ha Mahadev Khola, ki la leit ban khang tala noh shisyndon ïa ki ïing kiba don ha katei ka jaka.
Haba kren sha ki lad pathai khubor, u Bah Reuben Najiar u la ong, ba kane ka jaka ka long kum ka ktem ban ailad ïa ki nongdih drok bad ki kam awria ban shong ban sah, namar ba kane ka jaka ka long kum ka jaka kamai ïa ki ha kajuh ka por.
U la ong ruh ba kane kam dei ka mat kaba dang thymmai hynrei ka dei kaba la rim bha bad ba ka seng ka la ujor sha ka sorkar ha u snem 2023.
“Kane ka jaka la ai ïa ka dulir ha u snem 1929 ban shna tang ïa ka Mandir ym ban shna ïa ki ïingsah,” la ong u Bah Reuben.
U Bah Reuben u la ïathuh ruh ba haba kylli nangno kine ki briew ki ïoh jingbit ban shna ïing bad sah ha katei ka jaka, ki la ïathuh ba ki ju siew T.100 tyngka shisngi ban sah ha kane ka jaka, hynrei khlem tip mano uta u briew uba shim ïa ka pisa.
Shuh-shuh, u la ïathuh ba kine kiba sah ha katei ka jaka ki don ruh ïa ki ‘Epic’. Kumta na ka liang ka seng ka kyrpad ïa ka sorkar ba kan shimkhia ïa kane ka kam.
