Shillong, Naitung 31
Kawei ka longkmie kaba shong die ja die sha ha lynti ïaid kjat ki paidbah ha Civil Hospital, Shillong ba la tip kyrteng kum ka Pynbiang Syiemïong ka la ther tyngeh ïa u Myntri ka Sorkar Jylla u Bah Paul Lyngdoh da kaba ong, “Mynshwa u wan ban khroh ban jop ïa ka ilekshon hynrei mynta pat u ïuhroit pynban.”
Ïa kane, katei ka longkmie ka la pynpaw sha ki lad pathai khubor hadien ba u Bah Paul u la pyntip ba hadien ba la lah ban pynkynriah lut ïa kiba shong die madan ha Khyndai Lad kin sa bteng ban pynkynriah ruh ïa kiba shong die jingdie sa ha Civil Hospital.
Katei ka longkmie ka la ïathuh ba ka la shong die sha bad ja ha kane ka jaka la da ki phew snem mynta bad lada ka sorkar kan wan ban pynkynriah ïa ki shaei kin leit, namar ki la im bad bsa ïa ka ïing ka sem lyngba ka jingwan die jingdie ha kane ka jaka.
U Bah Paul u thmu ban wan weng sa ïa ngi na kane ka jaka bad u la klet noh ïa ka jingjop jong u ha kane ka ilekshon, ha kaba u la kular ba un ïarap ïa ki paidbah ka jylla hynrei mynta pat haba u la ïoh shong ha ka shuki u ïuhroit pynban ïa ngi, la ong ka Kong Pynbiang.
Ka la ong, “Ngi kyrshan ïa u Bah Paul ha ka por ilekshon da kaba kyrmen ba un ïarap, katba mynta dei ma u ban bam duh ïa ngi.”
Da kaba bynrap ruh, ba lada ka sorkar ka ai ka jaka kaba biang kin kynriah na Civil, hynrei lada kim ai ka jaka kaba biang ban shong die jingdie kin ym lah ban kynriah.
Haba kylli pat, katei ka longkmie ka la pynrem ïalade da kaba ong, ngi pynwit ïa ki paidbah ba ïaid lyngba kane ka lynti namar ba ka la khim, hynrei ngin leh kumno haba thngan ka kpoh ngi hap ban shong la ka shong.
