Shillong, Naitung 31
U Nongïalam ka Liang Pyrshah, Dr. Mukul Sangma ha ka Sngi Palei u la ong ba ha ka por jong ka jinglong Myntri Rangbah jong u um shym la nud ban kular ban pyntreikam ïa ka Inner Line Permit (ILP) khlem ka jingmynjur jong ka Sorkar Pdeng hynrei u la wanrah noh da ka Meghalaya Residents Safety and Security Act (MRSSA) kum kawei pat ka atiar na ka bynta ban ïakhun pyrshah ïa ka jingwan rung kyrthep jong ki briew nabar shapoh ka jylla.
Katkum ka jingong jong u, ka MRSSA Act ka pynkupbor ïa ki dorbar shnong ban pynbeit bad khmih bniah ïa ka rung bad sah jong ki briew kiba nabar.
“Namarkata, haba tip ba lada ka Sorkar India ka shim por ban mynjur na ka bynta ka jingdawa ïa ka ILP, ngam lah ban kular na ka bynta jong ka Sorkar Pdeng, bad dei namarkata ba nga khlem kular, nga khlem kular satia ïa ka ILP, hato nga la kular ïa ka ILP?,” la ong u Mukul haba kren sha ki lad pathai khubor.
U Mukul u la kynthoh ïa kane ka Sorkar kaba mynta na ka bynta ka jingïalam bakla ïa ka ïingdorbar bad ruh ïa ki paidbah nongshong shnong ka Meghalaya. U la kdew ba ka Sorkar ka la kular ban pyntreikam ïa ka ILP khlem da pynkohnguh ïa ka Sorkar India, kaba lam sha ka jingthok ïa ki paidbah.
“Hynrei ngi la mynjur lang da kawei ka sur ban shim ïa ka resolution hapoh ka ïingdorbar ha ka por ba kane ka Sorkar kaba mynta ka la kular ba ka lah ban leh ïa ka, ki la kular ba kin lah ban leh ïa ka, te ngi la ïamynjur ban kyrshan hynrei ngam shym la kular ha ka por jong nga namar nga tip ba ngan nym lah ban pynkohnguh ïa ka Sorkar India ha kato ka por. Ngam tip la mynta ngan dang lah ban pynkohnguh ne em lada nga hap ban mihkhmat ïa ka Sorkar, hynrei ha kato ka por nga la leh ïa kaei kaba dei ban leh, nga la leh homework, nga la tip ba ngan ym lah ban pynkohnguh ïa ka Sorkar India te balei ngan pynbiej ïa ki briew jong nga,” u la ong.
U Dr. Mukul u la ban ba ka MRSSA Act ka dei kawei pat ka atiar kaba biang bad ïadei dur kum ka ILP.
Haba kylli, u Dr. Mukul u la ong ka MRSSA ka dei kaba la pynwandur ban ïakhun ïa ka jingwan rung kyrthep jong ki briew nabar bad ba ka jingpyntreikam ïa ka kan ïarap ha ka ban pynbeit ïa ka jingrung bad ka sah jong ki briew ba wan nabar.
