
Shillong, Naitung 31
U samla Enlang Sawian uba bat kum u Education Secretary ka Hynñiewtrep Youths’ Council (HYC) u la pan da ka Right To Information (RTI) na ka tnad kam pohïing ka ri India ban pan jingshai halor ka jingbym pat pyntreikam ïa ka Inner Line Permit (ILP) ha ka jylla.
U la ong ba ka mat ka dei halor kaei ka jinglong- jingman kaba mynta halor ka resolution ba la phah da ka Meghalaya Legislative Assembly kynthup baroh 60 ngut ki nongmihkhmat naduh u snem 2019. Nangta u la pan jingshai ruh halor kaei ka jubab ba ka tnad kam pohïing ka ri India ka la phah sha ka Sorkar Meghalaya, ha kaba ïadei bad ka jingdawa pyntreikam ïa ka ILP.
Ha kane ka RTI, u samla Enlang u la kylli ruh, katno tylli ki jingïalang ba la pynlong hapdeng ki heh sorkar ka Sorkar India bad ka Sorkar Meghalaya naduh u snem 2019 haduh mynta ban ïakren halor ka ILP.
U samla Enlang u la buh jingkylli ruh, sa katno kan shim por ba ka Sorkar India kan mynjur ban pyntreikam ïa ka ILP hapoh ka jylla? Bad kiei ki daw ne ki tynrai ba la pynslem ïa ka Sorkar India ban pyntreikam noh ïa ka ILP ha ka jylla Meghalaya.
Haba kren sha ki lad pathai khubor ha ka Sngi Palei ka 31 tarik u Naitung 2025, u samla Enlang u la pynpaw ba kane ka jingpan jingshai halor ka ILP ka dei ban tip ba haduh katno ka Sorkar India ka shimkhia ïa kane ka jingdawa ka jylla ïa ka ILP bad u kyrmen ruh ba ka tnad kam pohïing kan jubab ïa kane ka RTI jong ka seng.
Shuh-shuh, u la ong ba ka daw ba la pynlong ïa u ban pan da ka RTI ka long ban tip mano ki bym treh ban pyntreikam ïa ka ILP hapoh ka Jylla, la ka dei ka Sorkar Jylla ne ka Sorkar India.
Nalor kata, u la ong ruh ba ki Myntri ka Sorkar MDA ki pyrshang ban ïalam bakla ïa ki paidbah ka jylla da kaba kynnoh beit ïa ka Sorkar India bad ki ju ïai ban ruh ban pyntreikam beit ïa ka MRSSA, katba ïa ka ILP pat kim ïa khmih lynti than.