Guwahati, Naitung:
U Myntri Rangbah ka jylla Assam, u Himanta Biswa Sarma, ha ka sngi Balang, u la pyntikna ba ki la don 7 ngut ki nong Bangladesh kiba la shah kem bad “shah pynphai biang” sha Bangladesh ha ki bor pahara ha ka por mynstep na Sribhumi, kaba don ha khappud Indo-Bangladesh ha South Salmara-Mankachar distrik jong ka Assam.
Kane ka jingleh ka dei shi bynta jong ka jingpyntreikam jong ka jylla kaba dang ïaid shakhmat. Ha ka jingthoh ha ki Social media, u Sarma u la pynpaw biang ïa ka jingpyntreikam tyngeh jong ka sorkar, da kaba ong, “Wat pyrshang ban rung tuh, phin sa shah kem bad shah pynkynriah biang.”
U la bynrap ba ka Assam kan dang long “ka ïing na ka bynta baroh ki nong India, ym na ka bynta ki bar jylla kiba rung be-aiñ kiba pyrshang ban pynkiew ïa ka jingbun briew jong ka jylla,” katba u la pynskhem biang ba ka sorkar jong u “kan ym shah ïa ki nongwan buhai shnong be-aiñ.”
Tang katto katne sngi hashwa, ki la don 20 ngut kiwei pat ki nongwan rung tuh kiba la shah pynphai biang kumjuh na kajuh ka thaiñ, kaba la pynkiew ïa ka jingkheiñ sha palat 377 ngut ha kine ki bnai ba la lah.
U Myntri Rangbah u la ban jur ba ka jylla ka dang ïai bteng ban pynlong ïa ka Assam kaba lait na ka jingwan rung tuh, da kaba pynpaw ïa ka jingpyrshang jong ka bor synshar kaba dang ïaid shakhmat ha shilynter ka thaiñ khappud.
Ki shipai ka tnat Border Security Force (BSF) ki la pynjur ruh ïa ka jingpahara ha kylleng u pud Indo-Bangladesh uba jngai 1,885 kilomitar ha ka thaiñ Shatei-Mihngi naduh ba la mih ka jingkulmar ha Bangladesh ha u snem ba la lah. Katba ki pulit ka Assam ki la pahara bha ha shi lynter khappud ban khanglad ïa ka jingwan rung beaiñ.
Ki heh sorkar ki la pynthikna ba la pyntreikam pyrkhing bha ïa ki lad jingïada ban pynthikna ba yn ym don uwei ruh u bar jylla uba lah ban rung sha ka jylla khlem ki kot ki sla kiba biang.
