Mawkyrwat, Naitung 31
Ka Balang Mawlangwir Higher Secondary School, Mawlangwir ka la long ka lahduh ha ka lympung ïalehkai badminton kaba la tip kum ka 6th South West Khasi Hills District Inter-School Badminton Championship 2025 ba la pynïaid da ka South West Khasi Hills District Badminton Association ha Mawlangwir Indoor Stadium, South West Khasi Hills District.
Ki nongjop na ka liang ki skul ha kane ka lympung ïalehkai ki long ka Mawlangwir Higher Secondary School, Mawlangwir kaba la ïoh khur haduh 4 tylli ki takma ksiar bad 5 tylli ki takma rupa, katba ka Christian Principles Academy, Mawkyrwat bad ka Little Star Higher Secondary School, Mawkyrwat ki la ïakhaid da kaba ïoh khur mar 3 tylli ki takma ksiar bad 2 tylli ki takma rupa.
Haba phai pat sha ka jingjop ha ki kyrdan ba la bynta; ha ka kyrdan 12 snem shapoh (single) jong ki khynnah shynrang, u Tyngshaiñlang Ïawphniaw u la long u lahduh bad ka Idapynkmen Marpna jong ki kynthei, ha ka kyrdan 14 snem shapoh (single) ka Alvatudor Marweiñ jong ki kynthei ka la wan ba nyngkong bad u Gedion Stiffinal Wanñiang jong ki shynrang, ha ka kyrdan 14 snem shapoh (doubles) dei ka Alvatudor Marweiñ bad ka Anniegrace Wanñiang kiba la rah ïa ka nam ka jingjop.
Ha ka kyrdan 16 snem shapoh (singles) jong ki kynthei bad shynrang la jop da ka Alvatudor Marweiñ bad u Mebankyrshan Ïawphniaw, ha ka kyrdan 16 snem shapoh jong ki khynnah kynthei (doubles) la jop da ka Aisukshisha Syiemlieh bad ka Naphilakyrmen Syiemlieh, katba ha ka liang ki shynrang la jop da u Nadap bad u Mebakyrshan.
Nangta, ha ka kyrdan 18 snem shapoh jong ki kynthei (single) dei ka Wansaphi Marpna bad u Asrian Mar’s Syiemlieh jong ki shynrang, ha ka kyrdan 18 snem shapoh jong ki kynthei (doubles) dei ka Ibapynkmen Snaitang bad ka Wansaphi Marpna, bad jong ki shynrang dei u Adrian Mar’s Syiemlieh bad u Batskhembok. Ki nongjop ha ka Mixed Double pat ki long u Donal Vicky Marpna bad ka Wansaphi Marpna.
Ha kane ka sngi la sam ruh ïa ka khusnam Most Promising Player sha u Tyngshaiñlang Ïawphniaw bad ka Alvatudor Marweiñ na ka Mawlangwir Govt Lower Primary School, Mawlangwir.
Lah ban kdew ba ki skul kiba wan shim bynta ha kane ka lympung ki don 11 tylli bad 143 ngut ki nongïashim bynta; 100 ngut na ka liang ki shynrang bad 43 ngut ki khynnah kynthei.
Ha kane ka sngi la ïadonlang u Bah Kynpham V. Kharlyngdoh kum u kongsan ha ryngkat u Bah H.S. Diengdoh, President ka South West Khasi Hills District Badminton Association, u Pastor L.E. Jyrwa, General Secretary barim ka South West Khasi Hills District Cricket Association, u babu Kynsaibor Marweiñ, Principal jong ka Balang Mawlangwir Higher Secondary School, Kong Rebeldalis Syiemlieh, Assistant Teacher jong ka Christian Principles Academy, Mawkyrwat, u Bah N. Wanñiang, Myntri Shnong Mawlangwir, ki riew rangbah, ki nongïashim bynta na ki skul, lem bad ki nonghikai.
