Shillong, Naitung 31
Ka Umrynjah ka la ïoh jingjop lai sien lynter na ka bynta ban pynthikna ïoh rung sha ka quarter-final na ka Group-B ha ka lympung ïalehkai Third Division Football League 2025 ba la pynïaid da ka Shillong Sports Association, hadien ba ka la lah ban pynliem noh ïa ka Lumparing da 3-1 kol ha ka Sngi Palei ha SSA Stadium kaba ha First Ground, Polo.
Kane ka jingjop kaba lai ka la pynlong ïa ka Umrynjah ba kan bat ïa ka kyrdan ha khlieh duh na katei ka group ryngkat 9 point na ki lai sien ïakhun, katba ka Umlyngka SC (7 point) ka la hiar sha ka kyrdan ba-ar bad ka Lumparing ka la pynkut da 5 point bad ban don ha ka kyrdan balai, nalor ka Rynjah SC (1 point) bad ka Imson SC (0) kiba don sha trai.
Haba phai sha kane ka jingïakhun, ka Umrynjah ka la pynkhih jar nyngkong eh lyngba u Banshemphang Nongkhlaw ha ka minit kaba 16. Kane ka shi kol ka la ïai sah haduh kaba kut jong ka kylla step.
Hadien katto-katne por ba la bteng ïa ka jingïakhun jong ka kylla miet, ka Lumparing ka la lah ban pynphai kylla shi kol lyngba ka penalty ba la shut da u Imerial Jana ha ka minit kaba 67 na ka bynta ban ïakhaid mar shi kol.
Hadien 1 minit ka Umrynjah ka la thep biang ïa ka kol ba ar lyngba u Wanborlang Nongbri. Ha shwa ban wai kane ka kynhun ka la thep biang ïa ka kol balai bad khatduh lyngba u Saiñborlang Jyrwa ha ka minit kaba 90+2 ban ïoh shisyndon ïa ka jingjop.
Lyngba kane ka jingshah rem ka Lumparing, ka la plie lad pat ïa ka Umlyngka ban jam sha ka quarter final, hynrei kan hap ban ïaknieh ïa ka kyrdan ha khlieh duh ha ka jingïalehkai kaba khatduh pyrshah ïa ka Umrynjah, katba ka Rynjah bad ka Imson kin hap ban ïaknieh ban pyllait ïalade na ka jingshah pynhiar kyrdan ha ka jingïakhun ka ban long ha ka Sngi Thohdieng ha ka por 1 baje mynsngi.
