Shillong, Naitung 31
Ka jingshalan ïa u dewïong ba la tih da ka juk stad saïan na ka jylla Meghalaya ka la sdang naduh ka Sngi Palei.
La pynkit ïa san tylli ki ‘trailer truck’ jong u dewïong ba la tih da ka juk stad saïan na Pahamlang Sales Depot kaba don ha Ri Bhoi district sha ki bynta bapher-bapher jong ka ri.
Utei u dewïong dei uba tih na Saryngkham A ha East Jaiñtia Hills, ha kaba u Dapmaiñ Shylla u dei kum nongshim wai.
Katkum ka jingong u Commissioner & Secretary, u Vijay Mantri, ka jingshalan ïa u dewïong ka la ïaid beit ïaid ryntih khlem kano-kano ka jingpynwit ne jingpynthut ha shi lynter lynti.
Kine ki trok la bud ryngkat bad ki kot ki sla kiba long katkum ka aiñ ba la ai da ka Sorkar Meghalaya, kaba la pynsuk ïa ka jingïaid jong ki lyngba kiwei pat ki jylla.
Kane ka jingpynroi ka pyni ïa u mawjam uba kongsan ha ka kam tih dewïong jong ka jylla, kaba pyni ïa ka jingtreikam jong ki rukom tih dewïong ha ka juk stad bad ka jingdonkam jong ki kot ki sla kiba biang ha kaba pynthikna ïa ka jingkit ïa u dewïong da kaba suk.
