Shillong, Naitung 31
Ka ‘thei apkol ka Jylla ka Ribansi Jamu ka la shah jied ban don ha ka thup jong 23 ngut ki ‘thei ïalehkai ban mihkhmat ïa ka kynhun Under-20 jong ka ri India na ka bynta ka AFC U-20 Women’s Asian Cup 2026 Qualifiers, kaba la thmu ban sdang naduh 6 haduh 10 tarik u Nailar mynta u snem ha Myanmar.
Kane ka la wan hadien ba u coach katei ka kynhun u Joakim Alexandersson u la pynbna ïa katei ka kynhun ha ka Sngi Palei.
Ha katei ka lympung, ka India ka la don ha ka Group-D, bad kan ïakynduh pyrshah ïa ka Indonesia ha ka 6 tarik, kumjuh ïa ka Turkmenis-tan ha ka 8 tarik bad ïa ka Myanmar ha ka 10 tarik u Nailar ha Thuwunna Stadium kaba ha Yangon.
Ka kynhun nongjop na katei ka group bad ki kynhun ba kynsai kiba wan ha ka kyrdan ba-ar na baroh phra tylli ki group kin ïoh rung sha ka AFC U20 Women’s Asian Cup ka ban long ha Thailand ha u Ïaïong lashem snem.
Kumba ka paw ka India ka la pyntbit ïalade na ka bynta katei ka lympung ïaknieh (Qualifiers) ha Padukone-Dravid Centre for Sports Excellence kaba ha Bengaluru, bad kum shi bynta jong kane ka jingpynkhreh, ki la leit sha Tashkent ban ïakhun ar tylli ki jingïalehkai paralok pyrshah ïa ka Uzbekistan U-20 ha kaba sdang jong une u bnai. Kane ka kynhun jong u Alexandersson ka la jop da 4-1 ha ka jingïalehkai kaba ar hadien ba ka la ïakhaid da 1-1 kol ha ka jingïalehkai kaba nyngkong. Te kumta la khmih lynti ba kane ka kynhun kan lah ban ïalehkai bha ha katei ka lympung.
Ka India ka la bteng ïa ka jingkilanmet ha Bengaluru hadien ba ki la wanphai na Uzbekistan. Ki la leit sha Myanmar ha ka miet jong ka Sngi Palei bad kin poi ha ka step kaba bud.
Ki kyrteng jong ‘thei ïalehkai ka India na ka bynta ka AFC U20 Women’s Asian Cup 2026 Qualifiers
Goalkeeper: Melody Chanu Keisham, Monalisha Devi Moirang-them & Ribansi Jamu.
Defender: Alina Chingakham, Cindy Remruatpuii Colney, Juhi Singh, Nishima Kumari, Remi Thokchom, Sahena TH, Shubhangi Singh, Thoibisana Chanu Toijam & Viksit Bara.
Midfielder: Anju Chanu Kayen -paibam, Arina Devi Nameirak-pam, Bhumika Devi Khumuk -cham, Monisha Singha & Neha, Pooja.
Forward: Babita Kumari, Deepika Pal, Khushbu Kashiram Saroj, Sibani Devi Nongmeikapam & Sulanjana Raul.
