Khliehriat, Naitung 31
Ka kylla long ka taïew kaba jop ïa ki pulit jong ka Jylla kiba don ha East Jaiñtia Hills District haba ka ïingbishar jong u Chief Judicial Magistrate ka la pynksan ïa ka jingtohkit jong ki pulit ha ki hynriew tylli ki mukotduma bad rai pynshitom ïa ki nongleh kam bymman kiba donkti ha kitei ki mukotduma.
Ka ïingbishar jong ka Chief Judicial Magistrate ka East Jaiñtia Hills District, hadien ba la tian bishar bad lap ba u Morning War u la leh bakla, kata ba u la pyrshang ban pynïap ïa la u khun ba dang lai snem ka rta da kaba ksih bad byrngem pynïap ruh ïa la ka tnga, la rai pynrem ïa u.
La rai pynrem ïa u ban siew ïa ka kuna kaba T.500 na ka bynta ka kam runar katkum ka kyndon 352 IPC bad T. 1,000 na ka bynta ka kam runar katkum ka kyndon 323 IPC.
Ha kawei pat ka khubor, u Bun Phawa u la shah rai pynrem namar ka jingthombor bad pyntieng pynsmiej ïa la ka tnga kaba u la ïakhlad noh. La rai pynrem ïa u 3 snem ban set patok ryngkat ka kuna T.30,000 na ka bynta ka kam runar katkum ka kyndon 498A IPC, 5 snem ka jingshah set patok ryngkat ka kuna kaba T.20,000 na ka bynta ka kam runar katkum ka kyndon 506 IPC, bad 1 snem na ka bynta ka jingshah set patok katkum ka kyndon 323 IPC.
U Shainingstar Dkhar u la shah rai pynrem na ka bynta ka jingjia aksiden kali ha surok kaba la jia ha ka 10 tarik Rymphang 2019. Hynrei ha ka jingbishar la kdew ïa u briew uba la shah rai pynrem kum u Jrewel Pale, kaba i kumba kam ïahap bad ki jingtip ba la ai ha ka mukotduma.
Ka ïingkashari ka la rai pynrem ïa u briew uba la shah rai pynrem ba un siew ïa ka kuna kaba T.1,000 na ka bynta ka kam runar katkum ka kyndon 279 IPC bad T.500 na ka bynta ka kam runar katkum ka kyndon 337 IPC.
U Jrewel Pale u la shah rai pynrem halor ka jingjia aksiden kali kaba la jia ha ka 26 tarik u Lber (March), 2020. U la shah rai set patok 6 bnai katkum ka kyndon 279 IPC bad 1 snem ka jingshah set patok katkum ka kyndon 304A IPC.
U Bikash Das u la shah rai pynrem na ka bynta ka jingjia aksiden kali kaba la jia ha u bnai Ïaïong (April) 2019. U la shah set patok 6 bnai katkum ka kyndon 279 IPC bad 2 snem ka jingshah set patok katkum ka kyndon 304A IPC.
U Sanki Lamurong u la shah rai pynrem halor ka jingktah kti ïa u Neini Bareh. La rai pynrem ïa u ban siew ïa ka kuna kaba T.400 na ka bynta ka kam runar katkum ka kyndon 352 IPC bad T.900 na ka bynta ka kam runar katkum ka kyndon 323 IPC.
