Nongpoh, Naitung 31
Ka ophis jong u Block Development Officer ka Umling C&RD Block hapoh ka jingïalam u Bah Eric Kevin Dkhar, BDO lem bad u MLA jong ka Jirang konstitwensi Bah Sosthenes Sohtun, ha ka Sngi Palei ki la lum la lang ïa ki nongïalam shnong jong ki shnong kiba hap ha ka thaiñ Byrnihat ban ïakren halor ka Solid Waste Management Project ka ban sa pyntreikam noh shen.
Ha kane ka sngi, na ka liang jong u Bah Eric Kevin Dkhar u la ïoh ban batai bniah bad ai jingpynshai ruh sha ki nongïalam shnong halor ki bynta kumno ban pyntreikam ïa katei ka project ka ban long ka jingmyntoi ïa ki paidbah nongshong shnong jong ka thaiñ Byrnihat kaba la ïoh ruh ïa kata ka nam kum ka jaka kaba don ïa ka lyer kaba jaboh tam ha ka pyrthei.
Kum ban pyntip hangne, ïa ka Solid Waste Management Project jong ka thaiñ Byrnihat la mang tyngka haduh T.1.46 klur lyngba ka National Clean Air Programme (NCAP) jong ka Sorkar Pdeng bad kane ka skhim kan long na ka bynta ki 20 tylli ki shnong kiba don ha thaiñ Byrnihat.
Haba kren sha ki lad pathai khubor, u Bah Sosthenes Sohtun, u la ai ka jingkhublei kyrpang sha u Deputy Commissioner ka Ri Bhoi lem bad ïa u BDO ka Umling C&RD Block bad ruh ïa ka Green Tech Foundation kiba la shimkhia ban pynurlong ïa kane ka project ka ban long ka jingmyntoi ïa ki paidbah ka thaiñ.
U la ong ruh ba ka jingïoh nam jong ka thaiñ Byrnihat ha kaba ïadei bad ka jingjakhlia jong ka lyer ka la pynlong ïa u kum u nongmihkhmat bad ki paidbah baroh ba kim sngewtynnad bad dap da ka jingsngewkhia, hynrei u la pynpaw pat ïa ka jingkyrmen ba lyngba kane ka project, lehse kan ïarap shibun ban pynduna ïa ka jingjaboh bad wanrah ïa ka khuid ka suba hapoh ki shnong ki thaw.
Kum u nongmihkhmat ka thaiñ, u Bah Sosthenes Sohtun u la buh ruh ka jingkyntu sha ki nongïalam shnong bad ki paidbah ka thaiñ Byrnihat hi baroh kawei ba kin don ïa ka jingkitkhlieh lang bad ïa shimkhia ban ai ïa ka jingïatreilang kaba pura khnang ba kane ka jingpyntreikam ïa kane ka project kan long kaba jop.
