Shillong, Nailar 01
Ka Sorkar Jylla ka la hukum ban ïaid shakhmat bad ka jingtohkit halor ka jingkynnoh jah rngai jong palat 4000 metrik ton u dewïong.
Katkum ka jingong u Symbud Myntri Rangbah ka tnad kam pohïing ka Jylla, u Bah Prestone Tynsong, ïa kane ka jingtohkit yn pynlong da ki bor distrik ba dei peit, ka ban wad ïa ka jingshisha kaba don sha lyndet jong kitei ki jingkynnoh.
U Bah Tynsong u la pynskhem ruh ba ka Sorkar ka pdiang sngewbha ïa kano-kano ka jingtohkit halor ka jingkynnoh tih dewiong be-aiñ, ka jingkhaïi, bad ka leit ka wan.
“Mynta, ngi la dep ban bthah ïa ki bor distrik ba dei khmih ban wad ïa ka jingshisha bad nangta ai ba kata ka kaiphod kan wan bad wat ïa kata ka kaiphod ruh yn sa phah sha ka Sorkar India,” u la ong sha ki nongthoh khubor haba kyntait ban ong eiei halor ka jingkren jong u Myntri ka tnad Excise, Bah Kyrmen Shylla ba ka jinghap slap ba jur ha ka Jylla ka lah ban long ka daw halor ka jingjah rngai jong 4000 MT u dewïong, kumba la kdew ha ka ‘Interim Report’ ba 31 ba la aiti da u Justice B.P. Katakey hakhmat ka Meghalaya High Court.
U Symbud Myntri Rangbah u la pynpaw biang ba ka aiñ kan sa shim la ka jong ka lynti lada lap ïa kino-kino ki kam be-aiñ.
“(La ka long) ka Supreme Court ne kano-kano ka tnad treikam, ngi pdiang (ïa kano-kano ka jingtohkit). Nga ju ïathuh ïa kata shaphang kane ka mat jong ka jingtih dewïong be-aiñ, ka jingkhaïi be-aiñ, ka jingpynkynriah be-aiñ ïa u dewïong, na ka por sha ka por nga ju ong ba lada don kum kine ki kam be-aiñ, kano-kano ka jingpynkynriah be-aiñ, kano-kano ka jingtih be-aiñ, ka aiñ ka don,” u la ong.
“Ka Sorkar ka la bthah ïa baroh ki bor distrik, ki Superintendent of Police, bad ki tnad treikam ba dei peit ban khmih bniah ïa kane ka kam bad ban pyntikna ba kan ym don kano-kano ka kam be-aiñ,” bynrap u Bah Tynsong.
