Shillong, Nailar 01
Ka long ka khubor kaba sngewtynnad na ka bynta ki paid riew ïeid phutbol jong ka ri India bad ka Mumbai, ha kaba u khlur ïalehkai phutbol ba paw ka Argentina, u Lionel Messi, u la pynkhreh ban wan jngoh ïa ka Wan-khede Stadium na ka bynta ka jingïalehkai ka ban long ha ka 14 tarik u Nohprah mynta u snem.
Ka Wankhede Stadium ka la long kaba paw naduh ki por ba la leit noh – ka jingjop ba sah jingkynmaw jong ka India ha ka World Cup ha ka 2 tarik u Ïaïong jong u snem 2011 ka la long kaba ha khlieh duh jong kata ka thup – hynrei ka jingwan jong u Messi kan pyndap ïa ka lynnong kaba pher bad kaba itynnad ha ka rekod ba donburom jong ka.
“Hooid, u Messi u la thmu ban wan jngoh ïa ka Wankhede Stadium na ka bynta kawei ka jingïalehkai ka ban long ha ka 14 tarik u Nohprah. Ki bor pynïaid ïa kane ka jingïalehkai (Wizcraft) ki la pan jingbit na ka bynta kane ka jingïalehkai, kaba yn sa die ïa ki tiket. Ïa kane ka jingkyrpad jong ki la ïakren da ka Council jong ka Mumbai Cricket Associa-tion ha ka jingïalang kaba dangshen bad la ai jingbit halor kane ka jingthmu,” la pynpaw ki tyllong khubor na ka MCA ha ka sngi Thohdieng. “Ki arngut ki khlur ïalehkai kriket ba paw ruh ki lah ban wan sha kane ka prokram,” u la bynrap.
Ki la don ki khubor kiba la pynpaw naduh ka 13 haduh ka 15 tarik u Nohrah, u Messi un leit jngoh ïa ki lai tylli ki nongbah- Kolkata, Delhi bad Mumbai- na ka bynta ki jingïalang ban ai burom ïa u halor ka pawnam ha ka kam ïalehkai bad ka jingaiti lut jong u ha kane ka jingïalehkai. La ïathuh ba ha Kolkata, yn ai khublei ïa u Messi ha Eden Gardens, ha kaba la khmih lynti ba ka Myntri Rangbah ka West Bengal, ka Mamata Banerjee, kan don lang ha katei ka jingïalang.
Ha ka por ba un don ha Kolkata, u Messi un pynlong ïa ka ‘football workshop’ na ka bynta ki khynnah bad un plie ruh ïa ka ‘football clinic’. Yn pynlong ruh ïa ka jingïalehkai ‘seven-a-side tournament’ kaba la khot da ka “GOAT CUP” kum ka jingburom ïa u ha Eden Gardens.
Lah ban kdew ha ka 6 tarik u Jylliew myntau snem, u Myntri ka tnad ïalehkai jong ka Kerala, u V. Abdurahiman, u la pynthikna ba ka kynhun ïalehkai phutbol jong ka Argentina, kaba la ïalam da u Messi, kan wan sha Kerala, na ka bynta ka jingïalehkai paralok ha u Risaw ne Naiwieng, ha Greenfield International Stadium kaba ha Thiruvananthapuram. Ka sorkar kan pdiang ïa kane ka kynhun kum ki nongwan jngohkai jong ka jylla da ka jingkyrshan ba pura jong ka sorkar. Ka sorkar Kerala ka la pynbna ha u snem 2024 ba ki dang pynbeit ïa ka jingïalehkai paralok bad ka Argentina.
Mynta, u Messi, uba la 38 snem ka rta, u dangbteng ïa ka jingïalehkai jong u ha ka kynhun ïalehkai Major League Soccer, ka Inter Miami.
U Messi u la wan teng sha India, ha u Nailar jong u snem 2011, u la shim bynta ha ka jingïalehkai paralok pyrshah ïa ka Venezuela ha Salt Lake Stadium kaba ha Kolkata.
Ha kane ka jingïaid lynti ha ka kam ïalehkai, u Messi u la ïohdiang haduh phra sien ïa ka khusnam Ballon d’Ors, hynriew sien ïa ka European Golden Shoes bad u la shah jied ruh ban ïohpdiang ïa ka khusnam best player ha ka pyrthei.
U long u nongïalehkai ba kynsai ha ka histori jong ka jingïalehai phutbol bad u la khur haduh 45 tylli ki trophy.
Kumba ka paw u Messi ula ïalam ïa ka Argentina ban rah ïa ka nam lahduh ha ka World Cup 2022, ha ka rta kaba 36 snem.
