Nongstoiñ, Nailar 01
Shi bynta ban nangkyntiew ïa ki samla donsap ha ki kam ïalehkai phutbol, u MLA ka Nongstoiñ Constituency u Bah Gabriel Wahlang lyngba ka MLA Cup Football Tournament Committee ka la pynbna ba kan sa pynlong da ka lympung ïalehkai ba la tip kum ka MLA Cup 2025.
U Bah R. Syiem, uwei na ki dkhot ka MLA Cup Football Tournament Committee, haba ïakren sha ki la pathai khubor u la ong ba ïa katei ka lympung yn sa sdang ban pynlong ha u Nailur mynta u snem ka ban dei ruh ka knockout bad ka jingpynïalehkai na ka bynta ka 32 Nongstoiñ Constituency yn pynlong ha ki 6 tylli ki zone katkum ka jingdon jong ki shnong.
Shuh shuh u la ong ruh ba ki don haduh 6 tylli ki zone kiba hap hapoh ka 32 Nongstoiñ Constituency kiba kynthup ïa ka Town Area, Mawliehbah bad Mawlangniang Area, ka Laitkseh Area, ka Umyiap Area, Lai Lyngdoh Area bad ka Byrki Sangriang Area bad na kitei ki zone ki kynhun kin hap ban ïaknieh ban ïoh rung sha ka pre-quarter ïa kaba yn sa pynlong ha sor Nongstoiñ.
Shuh shuh u la ong ruh ba ka Committee ka la kyntu ruh ïa ki klob ha ki Shnong ka Nongstoiñ Constituency ba kin wan ban ïashim bynta ha katei ka lympung bad kan don ruh ka khusnam da ka song pisa bad ïa ki jingtip kiba bniah lah ban phone ha kine ki number 8837455884, 8119094998 & 8787632803.
